Vyeblaarlikeur
Hierdie maklike likeur het ’n intense vyegeur. Skink ’n sopie of twee oor fyn ys en geniet dit yskoud, of gebruik die likeur as basis vir ’n mengeldrankie. Jy kan vodka of jenewer vir die resep gebruik. Dit maak ook ’n gawe tuisgemaakte geskenk (veral noudat interessante jenewerdrankies so in die mode is).
Ongeveer 14 jong vyeblare 625 ml witsuiker 800mlwater 750 ml jenewer of vodka
Was die vyeblare en laat staan dit vir ongeveer 20 minute in ’n bak met ligte soutwater.
Verhit die suiker en water stadig, terwyl jy roer, tot die suiker opgelos is. Voeg die vyeblare by en verhit tot kookpunt. Prut stadig vir ongeveer 30 minute (die stroop moenie vinnig kook of te veel afkook nie). Haal die kastrol van die hitte af en roer liggies. Bedek en laat staan vir 30 minute sodat die stroop kan afkoel, maar ook om soveel as moontlik van die vyegeur in die stroop te laat intrek. Voeg die jenewer of vodka by die vyeblaarstroop en roer. Syg dan die mengsel deur ’n moeseliendoek in ’n beker met ’n tuit. Vul gesteriliseerde bottels met die likeur en verseël lugdig. Laat staan die likeur vir minstens ’n maand op ’n koel, donker plek voor jy dit gebruik. Lewer ongeveer 1,6 liter likeur.
1 blik (420 g) kekerertjies, gedreineer, afgespoel en droog gedruk 45 ml olyfolie 7 ml fyn komyn Halwe blok halloumi (ongeveer 180 g), in blokkies gesny Ekstra olyfolie, vir braai 4 groot hande vol gemengde slaaiblare en babaspinasie 3 groot, gerookte hoenderborsies, grof gepluis 8 ryp vye, in kwarte gesny
35 ml moskonfyt 60 ml rooiwynasyn 60 ml olyfolie Seesout en vars gemaalde swartpeper na smaak
Voorverhit die oond tot 200 °C. Sit die kekerertjies op ’n bakplaat en bedruip met olyfolie. Meng goed. Sprinkel die komyn oor en oondrooster vir ongeveer 15 minute. Skud nou en dan die bakplaat om seker te maak die kekerertjies kry egalige hitte. Terwyl die kekerertjies rooster, braai die blokkies halloumi in ’n klein bietjie olyfolie in ’n swaarboompan tot goudbruin aan alle kante. Meng die slaaiblare, gepluiste hoendervleis en vye op ’n dienbord. Voeg die geroosterde kekerertjies by en rond af met die gebraaide halloumi.
Klits al die bestanddele vir die vinaigrette saam en sit voor met die slaai. Lewer 4 porsies.