SA sal altyd rooivleis moet invoer – Serfontein
BUROKRASIE is een van die groot versperrings wat die rooivleisbedryf verhinder om in ’n uitvoerbedryf te ontwikkel.
Mnr. Nick Serfontein, voorsitter van die Sernick-groep in die Vrystaatse distrik Edenville, sê Suid-Afrika is steeds ’n netto invoerder van vleis. Dit sal nie in die toekoms verander nie.
Hy was Maandagoggend die eerste gas op die Megaboeregesprekreeks op die Stellenbosse Woordfees.
Die Sernick-groep voer maandeliks sowat 300 ton vleis na China en die Midde-Ooste uit, maar Serfontein voorsien nie dat die res van die bedryf in sy spore gaan volg nie. Hy meen Suid-Afrika het te min grond, water en beeste om ’n netto uitvoerder van rooivleis te word.
“Ons grond en water raak al hoe minder weens verstedeliking en mynbou. Ons kan nie ’n groot uitvoerder van vleis word nie – ons moet oor tien jaar 30% meer aan die plaaslike mark lewer.”
WISSELKOERS
Boonop kniehalter burokratiese rompslomp boere wat die uitvoermark wil betree.
“Afgesien van bogenoemde probleme het ons ook met ongelooflike rompslomp te doen. Daar is ’n pak vorms wat jy moet invul as jy wil uitvoer.”
Sefontein sê uitvoergeleenthede sal wel opduik as die rand teenoor die dollar verswak.
“Die ouens wat gereed is daarvoor, gaan die vrugte pluk, maar ek dink nie ons gaan ’n groot uitvoerder word nie, want ons het nie genoeg grond nie – tensy ons op ál die wildplase weer met vleisbeeste begin boer.”
In 2015 is meer rooivleis in Suid-Afrika gelewer as waarvoor daar ’n behoefte was.
“Dit was die eerste keer in 20 jaar. Die rede daarvoor was die droogte, want meer as 3 miljoen beeste is geslag.”
Volgens Serfontein het dit ’n rimpeluitwerking op die prys.
WAARDEKETTING
“Die beesvleisprys het in die afgelope ses weke met 20% gestyg van R38/kg tot R46/kg. Dit wys jou net die skommeling. In ons waardeketting is die skommelinge pragtig, want ons kan dit absorbeer en benut,” het hy gesê.
Die Sernick-groep bestaan uit sewe afdelings – ’n Bonsmara-stoetery, ’n fase C-bultoetsstasie, ’n voerkraal, ’n voerfabriek, ’n abattoir en ontbeningsaanleg, ’n groot-en-kleinhandelsafdeling, en ’n uitvoerafdeling.
Die groep besit ook slaghuise en restaurante.
“As ek vandag terugkyk, was een van die belangrikste besluite wat ek nog geneem het om die hele waardeketting te ontwikkel.”
Prof. Mohammad Karaan, dekaan van die fakulteit landbouwetenskappe aan die Universiteit Stellenbosch, sê Serfontein het in 1983 op 250 ha geboer. Vandag strek die boerdery oor 5 000 ha. Tien jaar gelede was sy omset sowat R170 miljoen. Tans is dit meer as R1 miljard.
Serfontein is op die plaas Liebenbergstroom by Edenville gebore.