RCL WIL INVOER-KNYP SÓ SYSTAP
DIE kosprodusent RCL Foods se hoendersake-eenheid het in die ses maande tot Desember ’n verlies van R37,8 miljoen gely. Die maatskappy as geheel se verdienste voor rente, belasting, waardevermindering en afskrywing (ebitda) het met 21,9% gedaal.
As die hoendersake egter uitgesluit word, asook ongerealiseerde wins en verliese op verskansingsinstrumente, het die ebitda met 8,4% gestyg.
RCL Foods se onlangse afdanking van meer as 1 000 werkers weens die krisis het volgens mnr. Rob Field, finansiële direkteur, die Regering se aandag getrek. Betekenisvolle samesprekings tussen die bedryf en die Regering is nou onderweg.
RCL lewer reeds lank hoendervleis aan kitskosrestaurante en wil dié bedrywighede uitbrei sodat hy ál minder aan die mark vir kleinhandelhoendervleis en kitsbevrore stukke blootgestel sal wees, waar ingevoerde hoendervleis pryse afdruk.
Met die onlangse terugsnyding in produksie van kleinhandelhoendervleis is sowat die helfte van sy hoendersake nou kontrakte met kitskosrestaurante.
RCL Foods brei reeds die afgelope paar jaar sy dierevoer na verskillende spesies uit. Met die krisis in die hoendervleisbedryf wil hy nóg groter voervolumes vir ander diersoorte najaag, hoewel Field sê dit is nie iets wat oornag kan gebeur nie.
PEKEL EN SUIKER
Die Regering se nuwe 15%-perk op pekelwaterwatertoevoegings tot hoenderstukke het verlede Oktober in werking getree, met ’n grasietyd tot einde Januarie vanjaar. Field sê dit is nog moeilik om die presiese invloed te bepaal, maar pryse in die mark het reeds begin styg.
Die ebitda van RCL se suikersake-eenheid het met 69,6% gestyg danksy onder meer gunstiger suikerpryse en minder invoer. Die maatskappy verwag suikerproduksievolume, wat deur die droogte geraak is, sal teen einde volgende jaar weer normaal wees.
Oor die beoogde suikerbelasting sê Field die laer koers wat nou voorgestel word, behoort ’n effens kleiner invloed te hê. Hy is optimisties dat die mark mettertyd ná die inwerkingtreding sal stabiliseer en dat die invloed hoofsaaklik op kort termyn sal wees.