NUWE MIELIE VERHOOG OPBRENGS ‘MET TOT 50%’

’n Brasiliaanse onderneming wat genetiese navorsing en ontwikkeling doen, Agricomseeds, maak daarop aanspraak dat hy ’n nuwe, konvensionele mieliebaster geteel het wat opbrengste met tussen 35% en 50% verhoog.

Die baster, bekend as LEADGRAIN, is oor ’n tydperk van 12 jaar geteel en het ’n groot kop met byna dubbel die hoeveelheid rye en pitte wat ’n konvensionele mieliekop het. Die mielie is nie geneties gemodifiseer (GM) nie en is dus nie onderhewig aan regulasies nie, soos in die geval van GM mielies wat weerstand bied teen onkruiddoder of insekte.

Volgens mnr. Jean Carlo Landivar, uitvoerende hoof van Agricomseeds, is die baster gereed vir aanplantings in Brasilië vanjaar. As die ingeteelde eienskap in net die manlike of vroulike ouerplant voorgekom het, het die mieliekoppe van 20 tot 24 rye pitte. As die eienskap egter in albei ouerlyne voorkom, vermeerder die hoeveelheid rye tot 28 tot 32.

“LEADGRAIN maak dit moontlik om ’n laer plantestand te hê om hitte-stres te help voorkom. ’n Stand van 60 000 plante per hektaar werk goed. Dit is ’n ander benadering om opbrengste te verhoog as die normale praktyk van ’n hoë plantestand (74 000 plante per hektaar) wat die mielies dan vatbaarder maak vir hitte-stres.”

Hy sê hoër temperature skep toenemend probleme. Daar word bereken dat mielieopbrengste met van 15% tot 30% sal daal as daar nie nuwe droogteverdraagsame kultivars geteel word of beter praktyke toegepas word nie. “In ons navorsing sal ons ons bly toespits om plante meer bestand teen hitte en droogte te maak,” sê hy. – NICO VAN BURICK