VRYSTAAT LANDBOU KRY ’N PUIK VENNOOT VIR NUWE PROJEK
DIE anti-apartheidstryder en voormalige kabinetslid mnr. Jay Naidoo het sy gewig agter ’n Vrystaatse bemagtigingsinisiatief gegooi.
Kragtens die Ficksburg-verklaring wat onlangs op dié Oos-Vrystaatse dorp onderteken is, onderneem Vrystaat Landbou, die Earthrise Trust (waarvan Naidoo ’n trustee is) en etlike gemeenskapsorganisasies en internasionale hulporganisasies om die lot van landelike gemeenskappe te verbeter deur spesifieke opheffingsprojekte.
Mnr. Henk Vermeulen, hoofbestuurder van Vrystaat Landbou, sê die projek het sy oorsprong op die plaas Rustler’s Valley tussen Ficksburg en Rosendal wat aan die Earthrise Trust behoort. Daar het Naidoo sy ervaring in maatskaplike ontwikkeling gebruik om die plaasbewoners op te hef en te bemagtig.
“Jay wou grond verskaf aan die plaasbewoners sodat hulle hul eie voedsel kon lewer. Hulle het by Vrystaat Landbou aangesluit as ’n boerdery, hoewel die plaas meer vir toerismedoeleindes gebruik word. Ons het gesprekke begin voer oor hoe ons opheffingswerk in die omgewing kan doen.”
Die groep lê klem op maatskaplik-ekonomiese kwessies soos wanvoeding en werkloosheid, asook grondhervorming (spesifiek werknemers se verblyfen eiendomsreg).
Vermeulen sê verskeie grondhervormingsmodelle word ondersoek, met die hoop om meetbare uitkomste vir dié modelle te ontwikkel.
Onder die betrokke organisasies is AfriGrow, Oxfam Suid-Afrika en die Seriti-instituut. Die groep is voornemens om ontwikkelingsgeleenthede in die omgewing te ontgin, bestaande projekte uit te brei en vennootskappe te skep wat landbougemeenskappe bemagtig. Vrystaat Landbou beoog om dié inisiatief na die res van die provinsie uit te brei.
–