DIÉ WEEK IN DIE LANDBOU
SLAGGAT-PATROLLIE
Boere herstel gereeld self, en op eie koste, die slaggate op die R572 tussen Tom Burke en Swartwater naby die Botswanagrens in Limpopo. Vier bussies van twee skole ry elke dag op dié pad. Boere in dié omgewing is raadop oor die provinsiale regering se versuim om paaie in stand te hou, en opgewonde oor die gunstige uitspraak in Agri Oos-Kaap se saak teen die provinsiale regering daar. In die uitspraak word voorwaardes uiteengesit ingevolge waarvan boere vergoeding kan eis vir sulke werk. Lees meer op bl. 25.
STOP DIÉ HOENDER
Suid-Afrika het ’n verbod op pluimveeprodukte en dagoudkuikens uit Tennessee in Amerika ingestel ná ’n hoogs aansteeklike voëlgriep daar aangemeld is. Dis die enigste land waar Suid-Afrika se verbod net geld vir die streek waar die siekte voorkom, ’n toegewing in die Agoa-ooreenkoms. ’n Verbod het op 14 Maart gegeld vir pluimveeprodukte uit Nederland, Duitsland, Pole, Hongarye, Frankryk, Brittanje, Spanje en Israel. ’n Verbod op Deense produkte is onlangs opgehef.
ALLES-MALUMA
Die avokadokultivar Maluma, wat die afgelope dekade groot opgang in die avokadobedryf gemaak het ná dit op ’n plaas naby Levubu ontdek is, gaan nou sy eie maatskappy kry wat na bemarking, promosies en kultivarbestuur sal omsien. Mnr. Zander Ernst van die Allesbeste-boerdery en -kwekery, eienaars van die Maluma-handelsmerk, het op die onlangse Malumadag op Tzaneen gesê die skerp toename in produksie van Maluma-avokado’s en die belangstelling van bemarkers en andere wat die kultivar wil hanteer, noodsaak ’n meer formele struktuur. Landbouweekblad berig volgende week meer volledig daaroor.
WILD MIK WYER
Wildbedryf SA wil ’n miljoen hektaar omskep in wildreservate in swart besit, het me. Adri Kitshoff-Botha, uitvoerende hoof van dié organisasie, op ’n onlangse wildveiling gesê. Die veiling is gehou om geld in te samel vir die nuutgestigte Mebala Ya Rona-transformasietrust. Buiten ’n vennootskap met die nasionale regering om transformasieplanne te beding, werk hulle ook saam met Sanparke om nuwe veldwagters by te staan. Talle lede is betrokke by vaardigheidsontwikkeling, mentorskap en vennootskappe met voornemende swart wildeienaars.
WYN VIR ’N NUWE MARK
Die wynkelder Orange River Cellars het ’n nuwe handelsmerk bekend gestel om munt te slaan uit die groeiende wynmark onder jong, swart kopers. Mnr. Koos Visser, bemarkingsbestuurder, sê plaaslike wynverkope is 23 miljoen liter meer as die verlede jaar, en die meeste van dié groei is onder nie-tradisionele wyndrinkers.
KAROO-URAAN
Bestuursplanne vir een van drie beoogde uraanmyne in die Karoo is onlangs uitgereik vir openbare kommentaar. Die maatskappy Tasman doen aansoek om uraan en molibdeen by Aberdeen en Beaufort-Wes te myn. Volgens Ferret Mining and Environmental, die omgewingskontrakteur, strek die kommentaartyd vir dié verslag tot 22 April, maar in van die dokumentasie word die sluitingsdatum as 13 April aangedui. Die verslae is by munisipale kantore op Beaufort-Wes en Aberdeen beskikbaar, en aanlyn by http://bit.ly/2dAN8iS, of kontak stefancramer@gmail.com.
DRUIWE BONS TERUG
Die Suid-Afrikaanse tafeldruifbedryf se finale oesskatting vir 2016-‘17 staan op 65,4 miljoen kissies. Dit is heelwat hoër as die vorige skatting van 62,8 miljoen, 2015 se finale oes van 58,1 miljoen en 2014 se 59,3 miljoen. Die organisasie sê vanjaar se skatting moet gesien word teen die agtergrond van die 3,7% gemiddelde saamgestelde groeikoers oor vyf jaar. Dit verteenwoordig nie groot groei nie, maar eerder ’n herstel tot die bedryf se normale groeipatroon ná die afgelope droogtejare.