GRONDKWESSIE: NATUURLIKE PROSES IS BETER
Pres. Jacob Zuma se ampstermyn is besig om uit te loop en die ANC se gewildheid is besig om drasties te taan. Zuma besef dat hy iets drasties sal moet doen om enigsins iets blywends na te laat as sy termyn verby is. Hy gryp nou na strooihalms, want alles in SuidAfrika is besig om ’n kreeftegang te gaan.
Die strooihalms waarna hy gryp om sy bas by sy ondersteuners te red, is radikale grondhervorming en radikale ekonomiese transformasie, wat alles vanjaar blitsvinnig afgehandel moet word. Wat ’n onrealistiese droom!
Die towerwoord by grondhervorming is grondonteiening. Die hele proses gaan glo in een wet saamgevat word en alles gaan seepglad en sonder enige teenkanting en probleme afgehandel word, reken hy.
Wat die radikale ekonomiese transformasies gaan behels, is nie baie duidelik nie. Gaan die Regering ook die onteieningswetgewing gebruik of gaan hy nasionaliseer? Daar is mos reeds ’n voorstel op die tafel dat die Regering die hoenderbedryf moet nasionaliseer en dat dít dan die einde van die bedryf se probleme sal wees.
As ek vir Zuma raad kan gee: Wag eers so ’n bietjie met jou radikale planne en gaan kyk mooi wat is besig om in Suid-Afrika te gebeur. Volgens my waarneming vind daar ’n groot gesindheidsverandering plaas. Die swart mense besef al hoe meer dat die wit mense met hul kennis en kapitaal ’n groot rol te speel het om Suid-Afrika weer op die wenpad te plaas.
Ons land se mense raak al hoe gemakliker met mekaar. Kyk hoe is dit vandag op die land se sportvelde en in die restaurante en die groot inkopiesentrums. Oral is ons almal al hoe gemakliker met mekaar. In winkels gee niemand meer om wie hom of haar bedien nie. Op plase en by plaaslike ondernemings is mense wat 20 jaar gelede slegs hande-arbeiders kon wees, vandag in bestuursposte. Dit is ’n natuurlike proses wat vorentoe drasties gaan versnel, en almal gaan die vrugte daarvan pluk.
Al wat die Regering tot dusver met grondhervorming kon regkry, was om hoogs produktiewe plase te vernietig en miljoene rande te vermors wat broodnodig was om die land in stand te hou en op te bou.
As Zuma en sy Regering ’n blywende nalatenskap wil hê, moet hulle ál die landbougrond wat nutteloos lê en aan die staat en tradisionele leiers behoort, laat opmeet en in klein, middelslagen groot plase opdeel. As hul daarmee klaar is, dan weet hul hoeveel plase hulle het. Dan kan hulle vir elke plaas ’n opkomende boer gaan identifiseer en hom help om kaart en transport vir die plaas te kry.
Dit sal ’n baie goedkoper proses wees en baie meer mense gaan sinvol daarby baat vind, terwyl kommersiële boere ongehinderd sal kan voortgaan om Suid-Afrika van kos en valuta te voorsien. Kaart en transport is ’n absolute voorvereiste vir ’n suksesvolle, volhoubare boerdery. As dít gedoen word en die boere kry die nodige ondersteuning, sal dit baie gunstige gevolge vir die land hê, en Zuma sal ’n goeie nalatenskap hê.
Dit is oor en oor bewys dat gedwonge inmenging en om mense teen mekaar af te speel, nog altyd nadelige gevolge gehad het. ’n Natuurlike proses is altyd die beste, veral as dit tot almal se voordeel reg bestuur word. Dit is ook ’n funksie waarmee die Regering kan help. PETRUS ROUX Villiersdorp