EKONOOM SE DOOD ’N ENORME VERLIES
“EEN van die unieke en skaars landbou-ekonome wat met groot sorg met Suid-Afrika se landboudata kon werk,” is hoe dr. Frikkie Liebenberg (foto regs bo) onthou word deur die ekonoom prof. Johann Kirsten (foto regs middel).
Liebenberg (54) is op 10 Maart op sy plaas naby Bronkhorstspruit doodgeskiet. Hy was sedert 2012 ’n dosent aan die Universiteit van Pretoria nadat hy jare lank by die Departement van Landbou en die Landbounavorsingsraad gewerk het.
Kirsten, hoof van die Buro vir Ekonomiese Ondersoek aan die Universiteit Stellenbosch, was ’n oudkollega en studieleier van Liebenberg.
“Hy is waarskynlik die enigste kundige wat die detailtrajek van die kommersiële landbou sedert die uniewording in 1910 kon verstaan,” sê Kirsten. “Hy het vir ’n groot deel van sy loopbaan die historiese syfers van die SuidAfrikaanse landbou gedokumenteer en in die laaste tien jaar met die skattings oor die opbrengs van landbounavorsing wat betref landbouproduktiwiteit gewerk.
“Sy nalatenskap is sekerlik die aanbevelings vir korreksies tot amptelike data en sy pleidooi aan die Departement van Landbou, Bosbou en Visserye, sowel as Statistieke Suid-Afrika vir ’n omvattende en inklusiewe sensus van die landbou, wat strek oor die spektrum van klein tot groot plase.”
GEHEEL EN DETAIL
Prof. Nick Vink (foto regs onder), landbou-ekonoom van die Universiteit Stellenbosch, sê: “Hy was ’n regte detail-man, maar het ook altyd sy oog op die groter prentjie gehou. Die res van ons kon half skaamteloos gebruik maak van die kundigheid wat hy opgehou het.”
Hy sê Liebenberg was die enigste navorser wat die bedryf as geheel, maar ook belangrike detail, in perspektief kon sien.
“Frikkie wou ook altyd seker maak dat data akkuraat is. As hy eers met ’n datastel gewerk het, het jy geweet dis die beste wat jy gaan kry. Ons het nie nog so iemand in Suid-Afrika nie. Met hom weg sal ons van voor af iemand moet ontwikkel om dié tipe werk te doen.”
–