VSA hoendervleis trap vas
AMERIKAANSE hoendervleis op Suid-Afrikaanse winkelrakke was verlede jaar omtrent so skaars soos hoendertande, maar ’n onlangse foto op Facebook wys dat dit nou op minstens Food Lover’s Market se rakke te koop is.
In Desember was Amerika naas Brasilië Suid-Afrika se grootste bron van ingevoerde hoendervleis, toe 14,4% daarvan uit Amerika gekom het.
Mnr. Kevin Lovell, uitvoerende hoof van die Suid-Afrikaanse Pluimveevereniging (SAPV), sê
die styging kon verband gehou het met die invoerverbod uit sekere Europese lande weens voëlgriep. Verder kon die Suid-Afrikaanse verbruiker nou genoeg vertroue in die produk gekry het.
Altesame 65 000 ton Amerikaanse hoenderstukke aan die been mag sedert Januarie verlede jaar jaarliks sonder teenstortingstariewe ingevoer word. Dié toegewing is gemaak sodat Suid-Afrika deel kon bly van die Amerikaanse wet op groei en geleenthede in Afrika (Agoa).
Minder hoendervleis as verwag is egter ingevoer.
Ene mnr. Michael Basson het op 2 Maart ’n foto van Amerikaanse
hoendervleis in Food Lover’s Market op Facebook geplaas. Hy het gevra dat mense boere red en nie die produk koop nie. Teen 15 Maart is die foto meer as 13 500 keer aangestuur. Dit het ook uiteenlopende kommentaar ontlok. Sommige mense het met Basson saamgestem en gesê werkgeleenthede en die ekonomie word deur ingevoerde hoendervleis benadeel, maar ander het gesê hulle koop volgens prys.
Daar was ook verskeie mense wat ongunstige opmerkings oor wit boere gemaak het en gesê het hulle sal juis daarom die hoendervleis in grootmaat koop.
—