MEDITERREENSE OFFENSIEF SKEEL SA BEDRYF MIN
AL het sommige Mediterreense lande hard probeer om Suid-Afrikaanse sitrus vanweë swartvlek uit hul markte te hou, was verlede jaar een van die bestes ooit vir plaaslike produsente.
Dít is ’n pluimpie vir die SuidAfrikaanse onderhandelaars, sê mnr. Pieter Nortjé, voorsitter van die Suider-Afrikaanse Sitruskwekersvereniging (SASKV).
Nortjé het op die tweede SASKV-beraad in Port Elizabeth ’n paar waarskuwings gerig. Hy is bekommerd dat boere met grootskaalse uitbreidings besig is om hulself “in die moeilikheid in” te plant. Nagenoeg 6 miljoen nuwe bome is reeds vanjaar vir aanplanting bestem.
“Die afgelope vyf jaar was besonder goeie jare vir plaaslike produsente danksy goeie klimaat, die gesonde internasionale vraag en die verswakking van die rand.
Die bedryf beweeg egter histories deur sewejaar-siklusse. Met die groot uitbreidings in aanplanting sal nuwe afsetgebiede gevind moet word wanneer die nuwe aanplanting wasdom bereik.”
Ander gevaarligte is die voorkoms van valskodlingmot en die beskikbaarheid van besproeiingswater in gebiede waar nuwe bome aangeplant word.
MARKTOEGANG
“Nuwe marktoegang vir die groter produksie lê voor die deur van die Regering wat bilaterale ooreenkomste met veral China en Indië met minder streng protokolle moet beding.
“Die Regering kan ook baie daarby baat omdat dit sal meehelp dat meer werkgeleenthede aan ongeskoolde arbeid in landelike gebiede geskep kan word,” het hy gesê.