APPÈL TEEN OOS-KAAPSE VEEARTS SLEEP VOORT
DR. JOHAN VAN ROOYEN, staatsveearts en dosent by die Landbou-ontwikkelingsinstituut Grootfontein, is terug in sy pos as staatsveearts en dosent, maar die uitgerekte dissiplinêre saak teen hom is steeds nie afgehandel nie.
Van Rooyen het ná ’n skorsing van meer as sewe maande terug- gekeer na sy pos by dié kollege te midde van ’n hangende appèlproses in die saak teen hom.
Kragtens die wet moes Van Rooyen 30 dae vanaf appèl weer kom werk ná sy skorsing. Die appèl het gevolg op Van Rooyen se skuldigbevinding op vyf klagte wat sentreer om ’n magstryd tussen die unie vir staatsamptenare (Public Servants Association) en die unie Nehawu (National Education, Health and Allied Workers Union) op die kampus.
Van Rooyen het ’n klag by die Staatsdiensbemiddelingsraad ingedien waarin hy beweer hy is onregverdig geskors. Die arbiter van sy saak het beveel dat die Departement van Landbou, Bosbou en Visserye die saak teen 6 Desember moes afhandel. Sy werkgewer het dié bevel geïgnoreer. Van Rooyen se klag by die bemiddelingsraad word op 3 April aangehoor.
Van Rooyen het sy volle salaris ontvang vir die sewe maande van sy skorsing, terwyl hy nie sy werk as dosent en veearts kon voortsit nie. Volgens die staatsdiens se reëls mag ’n voorlopige skorsing nie bestraffend van aard wees nie.
Landbouweekblad het vroeër berig Agri Oos-Kaap het mnr. Omri van Zyl, uitvoerende direkteur van Agri SA, gevra om die saak namens die landbougemeenskap met mnr. Mike Mlengana, direkteur-generaal van die departement, te bespreek.