Paaie-hofsaak gee boere hoop
LIMPOPO-BOERE wat al duisende rande aan die herstel van vervalle plaas- en provinsiale paaie bestee het, hoop dat ’n hofuitspraak wat beslis het dat boere in die Oos-Kaap vergoed kan word vir die herstel van paaie, vir hulle uitkoms kan bied.
“Die feit dat daar só ’n uitspraak ten gunste van die landbou was, is goeie nuus, maar ek wil boere tog waarsku dat hulle nie nou links en regs moet begin paaie regmaak en wonder vir wie hulle die faktuur gaan gee nie,” sê mnr. Drickus Botha, die TLU SA Noord se streekbestuurder.
Hy meen die uitspraak van die Grahamstadse Hooggeregshof,
met duidelike voorwaardes oor wanneer sulke vergoeding kan plaasvind, sal ook in Limpopo van toepassing wees.
Hulle moet egter eers die uitspraak deeglik bestudeer.
Botha sê vervoerkontrakteurs wat voer na boere toe aangery het tydens verlede jaar se droogte, het selfs hul vervoerpryse gelaai om te vergoed vir skade wat hul voertuie weens die swak paaie gely het.
TEETYD
Paaie wat in ’n besonder slegte toestand is, is die R572 tussen Tom Burke en Swartwater, die R521 tussen die Valencia-myn en Pontdrif, die R561 tussen Marken en Baltimore en die R33 tussen Groblersdal en Stoffberg.
Swartwater se gemeenskap het al byna R300 000 aan herstelwerk aan die R572 be-
stee. “Ons het die provinsiale departement van paaie nou al gevra of hulle darem net diesel of teer sal help koop, maar niks,” sê mnr. Tank Hendriks van die Swartwater-boerevereniging.
Hy sê die ergste van alles is dat daar ’n hele kamp met padwerkers en stootskrapers van die provinsiale regering op Tolwe, sowat 50 km van Swartwater, is.
“Hulle was nog nie vanjaar hier nie, maar as hulle kom, kom hulle so ná nege-uur en dan drink hulle eers tee. Ná tee maak hulle so drie of vier slaggate reg, en dan is dit middagete. Die werkers moet dan vinnig klaar eet sodat hulle kan ry om betyds terug by die huis te wees.”
Hendriks sê Swartwater se gemeenskap is moedeloos en gaan beslis kyk of die Oos-Kaapse hofuitspraak ook op hulle van toepassing is. –