TELING VAN DIE SERETSE

Wildebeeste, wat ook bekend staan as die arm man se buffel, bly gesog vanweë hul voorkoms. Volgens mites is hulle saamgestel uit die oorskotdele van ander diere. Hul voorkwarte lyk soos dié van ’n bees, hul agterkwarte soos dié van ’n wildsbok en hul maan- en sterthare soos dié van ’n perd. Die dele van ‘n wildebees lyk asof dit nie lekker in verhouding is nie, tog is die diere al oor geslagte heen baie gewild.

Wanneer ’n seretse wildebees met een van sy eie soort teel, sal al die kalwers suiwer seretse-wildebeeste wees. Wanneer ’n gewone blouwildebeeskoei deur ’n seretse wildebeesbul gedek word, sal “split”-kalwers gebore word. As die “split”-diere deur ’n seretse bul gedek word, sal die kalwers van die kruising terugslaan na die suiwer seretse-bloedlyn. (Hou die 50-50-reël wat in genetika van toepassing is, in gedagte.)

In proewe is ’n seretse wildebeesbul saam met vroulike goue en koningswildebeeste laat loop. Die vroulike kalwers van albei kleurvariante was gewone blouwildebeeskalwers. Die proef het bewys dat die seretse wildebees nie kruis met kleurvariante nie.

Genetiese rekordhouding is nuut ten opsigte van die diere. Binnekort sal daar meer DNS-toetse en resultate beskikbaar wees. Die Seretse wildebeesklub moedig die akkurate vaslegging van inligting van teeldiere aan en stel hom ten doel om hierdie inligting vrylik beskikbaar te stel om sodoende die getalle van seretse wildebeeste aan te vul .

Min van die diere was al op veilings beskikbaar vanweë die lae getalle. Wildboere is daarom nog nie almal ingelig oor die genetiese eienskappe en herkoms van die seretse nie. Kopers op Piet du Toit-wildbedryf se veiling is opgewonde oor die beleggingswaarde en toekoms wat die seretse wildebees inhou. Die besonderse voorkoms van die bok sal definitief die aandag trek van natuurbewaarders, wildtelers en trofeejagters, wat beteken die seretse wildebees sal sy plek kan vol staan in ’n mededingende bedryf.