LUGBALLON GEE INTERNET, MAAR WAAR?
Die internetreus Google het aangekondig dat hy gereed is om binne die volgende maande breëband-internet vanaf slimballonne hoog in die atmosfeer na verbruikers op moederaarde te begin sein.
Dit kom ná drie jaar se toetse en baie skeptisisme oor of Alphabet, Google se moedermaatskappy, daarin gaan slaag om die ambisieuse Project Loon as ’n kommersiële besigheid te vestig.
Die aanvanklike doelwit was om breëband vir die hele planeet, selfs die mees afgeleë en armste hoekies te bring.
Intussen is tientalle Loon-ballonne op toetsvlugte die lug ingestuur. Die ontwerp is verbeter om hulle sterker en “slimmer” te maak.
VROEËR AS VERWAG
Luidens die jongste aankondiging is hulle nou vroeër as verwag gereed om met telekom-maatskappye vennootskappe te sluit om internet aan betalende verbruikers te verskaf.
Dié versnelling word toegeskryf aan nuwe “slim”-sagteware, berig die nuusdiens AFP. Dit stel die internetballonne in staat om met die hulp van winde hoog in die atmosfeer na ideale plekke te vlieg, en om dan in patrone te beweeg wat ’n betroubare web van internetdekking in die lug skep.
“Ons het daaraan gewerk om die ballonne slimmer te maak, amper soos ’n stel skaakstukke met die winde,” het mnr. Astro Teller, hoof van Google se Eenheid X, wat in beheer van die projek is, aan verslaggewers gesê. Hy is ook ’n wêreldbekende kundige op die gebied van kunsmatige intelligensie.
WAAR, IS NOG DIE GROOT VRAAG
Hy wou nie sê waar hulle beoog om eerste met telekommunikasie-netwerke te skakel nie, maar het wel aangedui dat die diens nie van meet af aan oor die hele wêreld beskikbaar gaan wees nie.
Google het in Junie 2013 aangekondig dat hy ballonne bou wat wêreldwye internetdekking na selfs die armste en mees afgeleë plekke op aarde sal bring.
Die plan het behels dat honderde sonaangedrewe lugballonne gekoördineerd in die hemelruim sou dryf en ’n onafgebroke internetverbinding na die aardoppervlak sein. Google het veral die wenkbroue laat lig met die aanspraak dat hy ballonne kan bou wat duursaam genoeg is om meer as 100 dae in die lug te bly, amper dubbel so lank soos die ruimte-agentskap Nasa s’n.
Einde verlede jaar het Google aangekondig dat een van sy ballonne, die Bolt, ’n nuwe projekrekord vir langlewendheid aangeteken het, deur 190 dae in die lug te bly. Die Bolt het in dié tyd meer as 122 000 km deur die lug geseil en ’n topspoed van 162 km/h bereik.
Daarvoor het sy sonpanele 1,72 gigajoule energie opgewek, genoeg om ’n weerligstraal op te wek.
Sy langafstandvlug het in Puerto Rico begin, van waar hy oor 19 verskillende lande en drie vastelande is, soms tot 20 353 m in die lug. “Dis dieselfde uitsig wat jy sal hê as jy van die bokant van 65 Eiffeltorings wat op mekaar gepak is, sou kyk,” plaas die maatskappy hierdie getal in perspektief.
Om tussen die verskillende atmosferiese winde deur op koers te bly, het die Bolt meer as 30 000 slim maneuvers gemaak.
Benewens die erge winde, het hy ook ekstreme temperature oorleef: Party nagte tot -83 °C, so ysig soos ’n Antarktiese winternag.