NOG ’N ULTRAPRESIESE GIFSPUIT IN WORDING
’n Europese agentskap ontwerp nou ’n presisiespuitstelsel wat hopelik die verbruik van onkruiddoders drasties sal verminder.
Dit behels kameras wat op onkruidspuite geïnstalleer sal word om ’n saailand vir onkruid te skandeer, en op die daad te bepaal presies waar gespuit moet word en waar nie.
EIT Digital sê hy is gereed om met bekendstellingsprojekte te begin.
Die doelwit is om met gevorderde slimtegnologie – onder meer 5G, Groot Data en die Internet van Dinge – boere in staat te stel om hul verbruik van onkruiddoders met tot 80% te verminder.
Die Internet van Dinge, ’n nuwe gonswoord, verwys na die tegnologie waarmee voorwerpe toenemend in netwerkstrukture met mekaar verbind word en as niemenslike internetdeelnemers begin optree.
5G is die vinnigste mobiele netwerktegnologie tot dusver en Groot Data verwys na die toenemende neiging om massiewe hoeveelhede data in digitale wolke te bêre.
Die EIT-span se plan is soortgelyk aan ’n projek van ’n span kundiges van die Universiteit van Reading in Berkshire, Brittanje, wat met húl beoogde presisiespuit mik om geen onkruiddoder op die gewas of op die grond toe te dien nie, net op die onkruid. Hulle hoop om só ’n stelsel teen volgende jaar gereed te hê vir voorlopige veldtoetse. – MARLEEN SMITH