Wat eet ons vanaand?
Idees vir moeitelose, bekostigbare aandetes is altyd welkom. Ons toetskombuis gee vyf smaaklike planne vir die week wat kom.
Frikkadelle
30 ml olie 12 rou frikkadelle (berei volgens jou gunstelingresep) 1 groot ui, grof gekap 3 knoffelhuisies, fyn gedruk 1 groen soetrissie, gehalveer, pitte verwyder en dun gesny 1 blik (410 g) gekapte tamaties 15 ml tamatiepasta 100 ml water Sout, swartpeper en suiker na smaak
Kors
1 eier 125 ml olie 125 ml melk 250 ml bruismeel Gekapte vars pietersielie, om oor te sprinkel
Voorverhit die oond tot 180 °C. Verhit die olie in ’n pan en braai die frikkadelle daarin tot goudbruin. Skep uit in ’n oondbak wat groot genoeg is sodat die frikkadelle in ’n enkellaag daarin kan pas. Braai die uie, knoffel en soetrissie in dieselfde pan tot sag. Voeg die tamaties, tamatiepasta en water by. Verhit tot kookpunt en laat prut vir ’n paar minute. Geur die tamatiesmoor na smaak met sout, peper en ’n bietjie suiker en skep dit oor die frikkadelle in die oondbak.
Klits die eier, olie en melk vir die kors saam en voeg dit by die bruismeel. Klits tot glad en skep die slap beslag in ’n egalige laag oor die frikkadelle. Bak vir ongeveer 30 minute, tot die kors goudbruin en gaar en die vulsel deurwarm is. Sprinkel vars pietersielie oor en sit voor met groente of slaai van jou keuse.
Lewer 6 porsies.
Viskoekies met groente
Nog ’n einde-van-die-maand treffer waarvan kinders ook baie hou. 2 x 170 g-blikkies tuna, goed gedreineer 1 ui, fyn gerasper 2 gaar aartappels, goed fyngedruk 250 ml bevrore ertjie-en-mieliemengsel 125 ml vars bruinbroodkrummels 125 ml fyngerasperde mozzarellakaas 1 eier, geklits 60 ml soetrissiesous 15 ml tamatiepasta Sout en vars gemaalde peper na smaak Olie, vir braai
Meng die tuna, ui, fyn aartappel, groente, broodkrummels en kaas goed saam. Klits die eier, soetrissiesous en tamatiepasta saam en geur goed met sout en peper. Voeg by die tunamengsel en meng goed. Sit die mengsel vir 15 minute in die yskas en vorm viskoekies. Braai in vlak olie tot goudbruin en deurgaar. Dreineer op kombuispapier en sit voor met knoffelmayonnaise óf soetrissiesous en ’n mengelslaai, of maak ’n bak aartappelskyfies daarby vir ’n meer vullende ete.
Lewer 4 porsies.
Stokvis-enhampakkies
Dis moeilik om te glo dat vis en gerookte ham so heerlik saam smaak. Jy kan ook basiliepesto hiervoor gebruik.
6 porsies stokvis Vars suurlemoensap Sout en vars gemaalde swartpeper 30 ml sagte knoffelbotter 90 ml songedroogde tamatiepesto, plus ekstra om voor te sit 6 groot stukke dun gesnyde, gerookte ham Olyfolie
Voorverhit die oond tot 200 °C en voer ’n bakplaat met foelie uit. Besprinkel die vis met
suurlemoensap en geur goed met sout en peper. Stip elke porsie vis met knoffelbotter en smeer ’n eetlepel pesto oor. Draai nou elke porsie vis in ’n stuk gerookte ham toe en steek dit vas met ’n peuselstokkie. Pak op die bakplaat en drup ’n bietjie olyoflie oor. Sprinkel ’n bietjie sout en peper oor en oondrooster vir ongeveer 7 minute, tot die vis gaar is en maklik vlok. Sit voor met opgekookte baba-aartappels en ’n slaai van jou keuse.
Lewer 6 porsies.
Maalvleisgebak met patat-bolaag
Hierdie maalvleisgereg is maklik om te maak, goedkoop en baie lekker. Die titseltjie komyn en suurroom in die vleisvulsel gee die lekkerste smaak.
2 uie, fyn gekap 4 knoffelhuisies, fyn gekap 30 ml olie 500 g beesmaalvleis of wildsmaalvleis 15 ml worcestersous 3 ml gemaalde koljander 3 ml fyn komyn Sout en vars gemaalde swartpeper na smaak 400 g spinasie, goed gewas en baie fyn gekerf 125 ml suurroom
Bolaag
4 middelslagpatats, geskil en in blokkies gesny Sout na smaak 30 ml botter 100 ml warm melk Fyn komyn, om af te rond
Braai die uie en knoffel in die olie tot sag. Voeg die maalvleis by en braai dit bruin. Voeg die worcestersous, koljander, komyn, sout en peper by en braai vir ’n paar minute. Voeg nou die spinasie by, bedek en verwyder van die hitte. Sodra die spinasie sag is, roer dit saam met die suurroom deur die maalvleis. Skep in ’n oondbak en hou eenkant.
Voorverhit die oond tot 180 °C. Kook die patats in ’n kastrol met ligte soutwater tot sag. Dreineer goed en druk die patats fyn met die botter en melk. Skep die patatkapok op die maalvleis en versprei egalig. Sprinkel ’n bietjie komyn oor en bak vir 20-30 minute, tot goudbruin en geurig. Sit voor met slaai of groente. Lewer 6 porsies.