Ervaar landbou op Zambië-skou
Agritech Ekspo Zambië word eersdaags gehou en almal is welkom – boere, sakelui, plaasbestuurders, kontrakteurs en landboukundiges. Dié skou voorsien in die behoeftes van die hele landbouwaardeketting in Zambië en sy buurlande.
Vroue is die ruggraat van die ontwikkeling van die landbousektor, sê me. Grace Musonda, ’n Zambiese onderwyseres en boer, en ’n besoeker aan Agritech Ekspo. Sy hou skool by die Amerikaanse Internasionale Skool van Lusaka langs die Leopards Hill-pad en haar plaas is in Mansa. Spintelligent, organiseerder van Agritech Ekspo Zambië, het met haar gesels.
Jy is ’n onderwyseres en ’n boer. Vertel ons meer oor jou werk en die boerderybedrywighede waarvan jy aan die hoof staan en die sektore waarby jy betrokke is. Ek is ’n 39-jarige vrou en ’n onderwyseres van beroep. Ek en my man boer reeds die afgelope tien jaar. Ons het ons grond in 2005 gekry en ons eerste grondboontjie-oes in 2007 ingesamel. Ons het in dieselfde jaar ook 16 verse en ’n bul aangeskaf. Ons het van 2008 tot 2012 met die kweek van kassawe geëksperimenteer. Tans boer ons met mielies, eetbare boontjies en beeste. Ons is op die punt om kweekhuisboerdery te beproef.
Hoe ervaar jy die rol van vroue in die landbousektor? Vroue is die ruggraat van die ontwikkeling van die landbousektor. Vroue verseker lewensbestaan, veral in die landelike gebiede. Danksy hul groot moeite in landbouproduksie waarborg die vroue se produksie selfversorging. Die landbou is die beste bedryf vir landelike en stedelike vroue. Dit behoort saam te gaan met beter toegang tot grond en hulpbronne.
Wat is die grootste probleme wat jul onderneming tans in die gesig staar? Die afstand is ’n uitdaging omdat ons alles van ver af moet beheer.
Hoe belangrik is tegnologie in die groei van landbou in Zambië? Tegnologie is die toekoms. Dit is uiters belangrik vir die pad vorentoe. Ons benodig tegnologie vir planteteelt, beesboerdery en omgewingsbestuur.
Wat is jou visie vir die sektor? Omgewingsvriendeliker boerderymetodes sonder om wins in te boet.
Hoe belangrik is dié skou vir die Zambiese boerderygemeenskap? Dit is baie belangrik omdat dit boere help om inligting te bekom oor die jongste tegnologie. Dit kan ’n mens help om te ontwikkel. Dit help ook boere om kennis met mekaar uit te ruil en uit ander mense se insigte te leer. Boere word ook blootgestel aan nuwe tegnologie en inligting.
Hoe het jy verlede jaar se skou ervaar? Dit was groter as die vorige een en meer maatskappye het uitgestal. Daar was ook meer masjinerie, en vir die eerste keer akwakultuur en baie veeboere. Inligtingsentrums was beskikbaar sodat mense maklik inligting kon bekom.
Wat wil jy graag by Agritech Ekspo sien? Ek wil graag paviljoene hê waar suksesvolle klein- en opkomende boere hul werk kan vertoon.