Pampoene te kus en te keur
Tydens Heidelberg se Reusepampoenfees word pampoene van alle soorte en groottes gevier, en dit is alles vir ’n goeie doel.
Heidelberg in die Wes-Kaap hou weer op 24 en 25 Maart die Reusepampoenfees. Shoprite Checkers is weer die borg en hy verskaf aan die deelnemers spesiale pampoensaad uit Kanada wat met die hand uitgesoek is.
Dill’s Atlantic Giant is die reus onder die pampoene en word spesiaal vir grootte geteel. Dié saad word nie op enige manier behandel of geneties gemodifiseer nie. Dit is die eerste keuse van mense wat pampoene van meer as 300 kg wil lewer.
“Dit verg talent, harde werk en natuurlik ’n bietjie geluk om ’n reusepampoen te kweek,” sê dr. Johan van Deventer, bestuurder by Freshmark, Shoprite se afdeling vir die verkryging en verspreiding van vrugte en groente.
“’n Stuk grond van 40 m² tot 60 m² in volle son word vereis. Nadat die saad ontkiem het, moet die pampoenplant deurentyd teen te veel blootstelling aan die son en wind beskerm word. Maak seker die blare bly droog wanneer die plant natgelei word. Dit is ook ’n uitdagende taak om ’n reusepampoen teen ystervarke en soortgelyke probleemdiere te beskerm. Daarom is dit geen verrassing dat sommige boere langs hul pampoene slaap nie!”
Mnr. Louwrens van Deventer is in 2016 as die Reusepampoen-kampioen bekroon met ’n pampoen wat die skaal op 373 kg laat kreun het. Mnr. Pinkie Swart was in 2014 en 2015 die kampioen. Shoprite Checkers borg die prysgeld en pryse word ook toegeken vir die kleinste, mooiste en lelikste pampoene.
Die Pampoenfees is ten bate van die plaaslike skole en die tehuis vir bejaardes.