AANTEELVEE STEEDS BETREKLIK DUUR
Die hoogste prys vir ’n Merinoram van die Retief-Geelbek-Merino’s op die Modern Merino-veiling, Hanover, was R45 000. Die aanbod van 100 ramme is teen gemiddeld R10 960 stuk verkoop.
Altesaam 73% van die 9 743 stoorlammers op die veiling van die Modern Merino-groep op Hanover is teen R29,50/kg tot R31,50/kg (lewend) verkoop.
Volgens dr. Cobus Oberholster van BKB is die prys van aanteelvee steeds betreklik hoog vanweë die hoë vraag ná die droogte en lammers is skaars. Die Karoo-veiling met sy aanbod van 10 000 lammers het die geskikte geleentheid vir kopers gebied om op een geleentheid geholpe te raak,” sê hy.
Die nege lede van die groep het die bemarkingsgroep sowat 18 maande gelede gestig om as ’n jongooiklub teelvordering te maak. “Skaapvleis het vir die verbruiker so duur geword en deur ons regstreekse betrokkenheid wil ons mense weer van die heilsaamheid van skaapvleis bewus maak,” sê mnr. P.W. de Vos van die plaas Quaggasfontein, Colesberg.
Hy is ook oortuig dat die lewering van ’n gehalteproduk die eerste stap in rooivleis bemarking is wat met die samewerking van die belanghebbendes aangehelp sal word.
Een van die oogmerke van Modern-Merino is om ook teeldiere van topgehalte beskikbaar te stel.
“Ons bemark van ons beste diere om ons medeboere in ons distrikte te help om teelvordering te maak.”
Sowat 500 ooi-speenlammers is deur mnr. Izak Nel van Letsatsi by Smithfield teen R2 100 stuk as aanteelvee gekoop. Die hoogste prys vir groepe dragtige tweetand-ooie was R2 500 stuk.
Die afslaer was mnr. Gert Jordaan van BKB Middelburg.