DIE POTENSIAAL IS DAAR
Bewaringslandbou, spesifiek verminderde bewerking, het die afgelope tyd die botoon gevoer in die produksie van wêreldrekordgraanopbrengste met mielies.
Die heersende wêreldrekord is 33,39 ton/ha, wat mnr. David Hula in 2015 in Amerika se nasionale vereniging van koringverbouers se gewilde mielieopbrengs-kompetisie behaal het. Dit was met geenbewerking behaal.
Die jongste wenner, vir verlede jaar se oes, is mnr. Randy Dowdy, wat 32,7 ton/ha afgehaal het. Dit was ook, soos Hula, in die kategorie vir strook- en geenbewerking onder besproeiing.
Randy het ook al ’n sojaboonopbrengs van net onder 7,4 ton/ha behaal.
Hy is toegespits daarop om stres by sy plante reg deur die groeityd tot die minimum te beperk.
“Hoe ons die onvermydelike stres wat ’n plant deur die jaar moet hanteer, bestuur en verlig, bepaal hoe ons die meeste uit die genetiese opbrengspotensiaal van vandag se basters haal,” sê Randy.
Hy gebruik byvoorbeeld vogmeters wat op drie verskillende gronddieptes (15 cm, 30 cm en 45 cm) die onttrekking van water in die wortelsone meet, en skeduleer sy besproeiing daarvolgens.
Mnr. Corné van der Westhuizen en me. Hanlie Geldenhuys, landboukundiges van Pannar, meen Hula se wêreldrekord is waarskynlik naby aan huidige basters se genetiese potensiaal.
Hula is ook die houer van die vorige wêreldrekord, toe hy in 2013 net minder as 28,5 ton/ha gestroop het.