SPROUT-SPRUIT
Pannar se slimfoontoepassing (app), Sprout, is al meer as 3 000 keer afgelaai.
Dié nuttige stukkie gereedskap is veel meer as ’n ensiklopedie of handboek. Dit word voortdurend verfyn en met nuwe funksies bygewerk, sê me. Christin Hunter, kommunikasiebeampte.
Sy sê ’n “Bakkie Buddy” vir sojabone, soortgelyk aan die bestaande aanlynveldgids oor mielie-, koring- en sonneblomsiektes, is op pad.
Nog ’n nuwe funksie op die horison is ’n diens waarvolgens ’n boer met sy slimfoon ’n foto van ’n siek plant sal kan neem en dit op die app laai, waarna dit aan ’n Pannar-landboukundige gestuur word om geïdentifiseer te word.
Safex-pryse word elke 15 minute op die app bygewerk, en daar is ’n rits ander nuttige hulpmiddels, soos ’n funksie waarmee ’n boer verskillende kultivars sy aan sy kan vergelyk om die geskikste produk vir sy toestande te kies.
Ander spesialis-rekenaars op die app sluit in ’n plantestand-aanbeveling vir mielies, ’n oorplant-rekenaar en een waarmee opbrengs beraam kan word.
Die app kan gratis afgelaai word en is net 4 MB groot.
Dit kan gebruik word selfs al is daar nie ’n internet-sein beskikbaar nie. Net die bywerking van die Safex-pryse is van ’n internetverbinding afhanklik.