SKEERTYD VERVROEG

Tradisioneel was skeertyd in Oktober, November en Desember. In 2015 het hulle die skape met ’n masjien geskeer voordat hulle na die lande met oesreste gegaan het. Daardie wol het ’n skoonopbrengs van 75,01% behaal. Die treksterkte het ook verbeter tot 40-46 N/kt (die eenheid waarin treksterkte gemeet word).

Van BP se 14 lotte wol op een veiling was nege lotte 17,2 mikron en laer. Die fynste lot was 15,7 mikron.

Op die lande is die nuwe wolgroei nog kort genoeg teen die tyd dat daar genoeg groen grasweiding is sodat die stof op die lande nie ’n noemenswaardige uitwerking op die skoonopbrengs het soos voorheen toe die skape met sesmaandewol op die lande gaan wei het nie.

Die verandering in voeding vanaf gras na lande veroorsaak dat die wol in die middel gebreek het. “Nou skeer ons presies op die breek”, verduidelik BP.

Op ’n wolveiling op 15 Februarie het Langfontein altesame 32 lotte wol van onder 17 mikron aangebied, waarvan die fynste lot 14,3 mikron was. Sommige van die lotte se treksterkte was tot 48 N/kt. Hulle het ook die hoogste prys op die veiling behaal (R150,60/kg) vir ’n lot van 15,6 mikron met ’n treksterkte van 40 N/kt. Dit kom neer op ’n skoonwolprys van R212,95/kg.

Verlede jaar het die boerdery vir die sesde keer CMW/OVK se eerbewys ontvang vir die produsent met die hoogste omset en meeste kilogramme wol wat in ’n seisoen gelewer is.

Hulle het erge las van roofdiere, soos rooijakkalse, rooikatte en bosvarke, wat onder die skape maai. Die varke beskadig ook gesaaides.

Daarom het die boerdery ’n paar spanne werkers op perde wat elke dag probleemdiere met honde jag. Hulle behaal groot sukses. Snags jag hulle met gesofistikeerde toerusting.