Kry só genotvolle jagtog in die visier
Met die jagtyd om die draai is talle jaggeesdriftiges besig om die laaste reëlings te tref. Mnr. Fred Camphor van die Suid-Afrikaanse Jagters- en Wildbewaringsvereniging gee sy wenke oor hoe om vir ’n jagvakansie voor te berei.
Voordat jagters in hul bakkies spring en die veld gaan aandurf, moet heelwat beplanning gedoen moet word.
“Eerstens moet jy bepaal wanneer en waar jy wil gaan jag. Kry jou toerusting en wapen reg. Dit is ook belangrik om te oefen om akkuraat te skiet,” sê mnr. Fred Camphor, uitvoerende hoofbeampte van die Suid-Afrikaanse Jagters- en Wildbewaringsvereniging (SAJWV).
Fred sê jy behoort minstens tien skote op ’n skietbaan te skiet vir elke skoot wat jy in die jagveld gaan skiet. Maak seker die geweer werk soos hy moet en dat die teleskoop reg ingestel is. Dit is ook belangrik om jou skietposisie te oefen.
“’n Dier staan nie altyd stil nie. Hy kan gedraai na jou kant toe staan, of baie verder of heelwat nader. Dalk rus jy teen ’n boom of staan gehurk. Voorbereiding gaan oor jou geweer én jou eie vermoë,” sê hy.
Jou kleredrag en skoene moet ook aandag kry.
“Deesdae dra al hoe meer jagters kamoefleerpakke. As die jagveld van so ’n aard is dat jy die bok moet bekruip, moet
jy veral na jou skoene kyk. In die bos kan jy 15-20 km per dag loop. Nuwe skoene kan dán pynlik wees. Om daardie rede moet jy ook fiks wees.”
WEET WAT JY KRY
Hoor betyds of toerusting vir vleisverwerking op die jagplaas beskikbaar is.
“Sommige plase het wel die geriewe, maar party het nie. As tafels, ’n vleissaag, messe, ’n vleismeul, worsderms, kruie en speserye nie op die plaas beskikbaar is nie, moet jy dit saambring,” sê Fred.
Dit veroorsaak probleme as jagters nie die bepalings en voorwaardes verstaan van die plaas waarop hulle gaan jag nie – en verkieslik moet hulle hulle daarvan vergewis voordat hulle opdaag. “Maak seker oor al die reëlings, want anders kan jagters en boere lelik vassit,” sê Fred.
Mnr. Wilhelm Greeff, ’n wildboer en beroepsjagter, sê dit versuur verhoudings tussen jagters en boere as die bepalings en voorwaardes nie nagekom word nie. Wilhelm besit Zinyathi Lodge by Steenbokpan naby Lephalale in Limpopo.
“Ek bedryf ’n wildsplaas. Die grootste konflik wat ek nog met ’n jagter gehad het, was toe ’n sekere jagter ’n dier in ’n trop geskiet het wat ek spesifiek gesê het nie geskiet mag word nie. Ek het dit duidelik gestel dat as ’n jagter wel een van dié koedoebulle skiet, gaan die jagter die buitelandse prys in dollar vir die dier betaal. Die betrokke jagter het sowaar ’n trofee-koedoebul geskiet en geweier om daarvoor te betaal. Natuurlik is hy nou in my ‘swart boek’ aangeteken en hy sal nie weer by my jag nie,” sê Wilhelm.
JAGPERMITTE
Wanneer jy besluit het waar jy wil gaan jag, moet jy vasstel of die plaas onderhewig is aan die betrokke provinsie se natuurbewaringsordonnansies. Indien nie, moet die plaas ’n vrystellingspermit hê.
“Die vrystellingspermit dui ook aan watter spesies jy mag jag,” sê Fred. “As die plaas nie ’n vrystellingspermit het nie, moet die jagter ’n jaglisensie bekom. Die plekke waar jy om ’n jaglisensie kan aansoek doen, wissel van provinsie tot provinsie. In die Noord-Kaap is dit byvoorbeeld by die poskantoor beskikbaar. Die jagter moet seker wees watter permitte en lisensies is nodig en waar hy dit kan kry.”
Dit is ook belangrik om te weet watter vleis met of sonder ’n permit tussen provinsies of selfs binne ’n provinsie vervoer mag word. “Wildevarke se vleis mag byvoorbeeld nie sonder ’n spesiale permit vervoer word nie.”
As jy gaan jag in die buiteland, soos in Swaziland, Namibië, Botswana of Zimbabwe, is ’n inen uitvoerpermit vir jou vuurwapens en ’n invoerpermit vir die vleis noodsaaklik. Die permitte om die wapen uit te voer, is by die polisie beskikbaar. Jy moet in die land waar jy gaan jag, ’n permit kry om die wapen terug te bring. ’n Permit vir die invoer van vleis is ook nodig. Dit is beskikbaar by die Departement van Landbou (die veeartsenydiens).
BEGROTING
Besluit vooraf hoeveel geld jy wil uitgee en hou daarby wanneer jy in die veld is.
“Rooibokke is goedkoper as koedoes. Dit is maklik om jouself in die moeilikheid in te skiet as daar ’n bok verbyloop waarvoor jy nie begroot het nie,” sê Fred.
“Dit het duur geword om te jag. As jy net vir die vleis gaan jag en nie vir die ervaring van die natuur, die wild en die veld nie, kan dit goedkoper wees om na die naaste slaghuis toe te gaan en biltong en droëwors te koop.”
Fred sê vir talle SAJWV-lede is jag ’n gesinsvakansie.
“Dit is ons lekkerste vakansies per jaar. Soms sal ek terugkom van ’n jagvakansie sonder dat ek een skoot afgevuur het. Dit is ook lekker. Dit gaan oor die hele belewenis van die veld, natuur, omgewing en wild. As jy met vleis terugkom, is dit eintlik ’n bonus,” sê hy.