HOËR HEFFINGS DEMP GOEIE NUUS OOR BRANDSTOFPRYS

As dit nie was vir die verhoging in die brandstofheffing en ook die hoër padongelukkefondsheffing wat op 1 April in werking tree nie, kon verbruikers na goeie nuus oor brandstofpryse uitgesien het.

Mnr. Dawie Maree, hoof van landbou-inligting en bemarking by FNB, sê teen die middel van die maand was die oorverhaling vir petrol 44-47c/l en vir diesel was dit 22c/l. “Hierdie vlak van oorverhaling was bewerkstellig danksy die relatiewe sterkte van die rand teenoor die Amerikaanse dollar en ook die bestendige vertoning van Brent-ruoliepryse.”

Maree sê verbruikers sou kon uitsien na laer pryse, maar die verhoging van 30c/l in die brandstofheffing en die verhoging van 9c/l in die padongelukkefondsheffing wat in die Minister van Finasies se begrotingsrede in Februarie aangekondig is, sal die goeie nuus laat wegkwyn. “Die verwagting is nou dat die prys van petrol met ’n skamele 4c/l sal verlaag, indien dit wel gebeur. Die prys van diesel daarenteen gaan waarskynlik dan met 15-20c/l styg.”

Die algemene brandstofheffing sal vanaf April R3,15/l wees en die padongelukkefondsheffing styg tot R1,63/l.

Brandstofpryse het in Maart vir die eerste keer effens gedaal met 8c/l vir petrol en 2c/l vir diesel. Die prys van petrol het in Januarie met 50c/l en in Februarie met 29c/l gestyg, terwyl die prys van diesel met onderskeidelik 39c/l en 21c/l gestyg het. –