SÓ WORD JY ’N WÊRELDSPELER

PRODUKGEHALTE, biosekerheid en naspeurbaarheid is deurslaggewend as SuidAfrika hom as ’n gerekende rooivleisuitvoerder in die wêreldmark wil vestig.

Dit was die boodskap van mnr. Don Heatley, voormalige voorsitter van Meat Livestock Australia (MLA) en ’n bekende in rooivleiskringe, op die rooivleisbedryfsforum in Pretoria.

Ofskoon SuidAfrika, met ’n jaarlikse produksie van bykans ’n miljoen ton rooivleis die 13de grootste rooivleisprodusent ter wêreld is, dra dié land slegs 1,55% tot die wêreld se rooivleisproduksie by.

Boonop bedra SuidAfrika se rooivleisuitvoer slegs 0,64% van die wêreldaandeel in rooivleisuitvoer, oftewel 60 000 ton rooivleis (tabel). Daarenteen lewer Australië meer as 2 miljoen ton rooivleis (3,43%), waarvan sowat die helfte uitgevoer word. Healy sê die Australiese model is nie perfek nie, maar dié land se bedryf het heelwat lesse geleer waarby SuidAfrika baat kan vind.

SUKSES

“Die model moet eerstens daarop geskoei wees om bemarking en al die gepaardgaande fasette, soos kommunikasie, met navor sing te verbind in een liggaam wat namens die hele bedryf kan optree. In Australië is dit die MLA , en dié organisasie se doelwit is eenvoudig: Help die rooivleisbedryf om meer geld te maak.

“Boonop bestaan die direksie uit vaardigheidsgedrewe personeel wat vertroud is met internasionale handel en die neigings daarvan,” het hy gesê. Healy het ook gesê politiekery mag nie vatplek binne so ’n organisasie hê nie. “Die Australiese regering is ’n vennoot in die rooivleisbedryf en finansier die MLA op ’n dollarvirdollargrondslag. Vir elke dollar wat die organisasie dus uit sy aktiwiteite voortbring, dra die regering ’n dollar tot die bedryf by.”

Die sukses van dié model spreek vanself: Ten spyte van ’n vier jaar lange droogte is Australië steeds een van die vier grootste uitvoerders van rooivleis ter wêreld.

PREMIE

Heatley meen ook dat die oorskakeling van ’n karkasgradering na ’n snitgraderingstelsel ’n land die geleentheid bied om ’n premieprys vir sy produk te verkry. “Op hierdie manier verander die rooivleis wat uitgevoer word in ’n hoëprofielproduk en is dit nie meer net nóg ’n kommoditeit nie. Vir SuidAfrika kan dit goud werd wees om homself veral in die MiddeOosterse markte te vestig as ’n verskaffer van rooivleis van hoë gehalte.” Om dit reg te kry, kort naspeurbaarheid egter dringend aandag.

“Die naspeurbaarheid van rooivleis in Australië is geheel en al op wetenskaplike beginsels gegrond, met die grootste enkele klem daarop om aan die verbruikers ’n produk te bied wat elke keer op standaard is.

“Die inligting wat hierdeur van die verbruikers verkry kan word, is van groot waarde om jou bedryf na hul behoeftes in te stel. Dit is tog op die ou end die verbruiker wat die eintlike waarde vir die bedryf ontsluit en daarvan ’n volhoubare besigheid maak,” sê hy.