Maluma word ’n kwekersklub

’N NUWE MAATKAPPY, Maluma SA (Edms.) Bpk., is in Januarie gestig om onder meer bewustheid ten opsigte van Maluma, ’n relatief nuwe avokadokultivar, uit te brei en die vraag daarna te stimuleer. Dit sluit ook in om gehalteprotokolle voortdurend te verbeter en die langtermynvolhoubaarheid van die kultivar te bestuur.

Mnr. Zander Ernst is verbonde aan die Allesbeste boerdery en kwekery, Tzaneen, wat die Malu mahandelsmerk besit.

Hy het onlangs aangekondig dat die skerp toename in die verbouing van Malumaavokado’s en die belangstelling van bemarkers en ander tussengangers wat die kultivar wil hanteer, ’n meer formele struktuur noodsaak.

Hy sê die belangrikste verskil tussen Maluma SA en ander kwekersklubs van vrugtekultivars is dat lidmaatskap van Maluma SA heeltemal vrywillig is.

Boere kan dus as Maluma-kwekers registreer. Dié wat nie registreer nie, sal hul produk nie meer onder die Maluma-handelsmerk kan verkoop of toegang hê tot protokolverbetering nie.

ONTWIKKELING

Avokadokwekers sal egter steeds toegang tot die jaarlikse Malumadag geniet. “Die Malumadag is op boere gemik en Maluma SA se doelwitte lê klem op bemarking, nie produksie nie,” sê Ernst.

Allesbeste sal dus die Malumadag aanbied en Maluma SA sal dit nie finansier nie.

Hy sê die Maluma-handelsmerk kan ook in die toekoms gebruik word vir ander kultivars wat meer bewustheid nodig het om volhoubaar te bly, hetsy ouer, vergete kultivars of nuwe teelmateriaal.

Of Maluma SA nou die Maluma of enige ander kultivar bestuur, verskil dié maatskappy van ander kultivargedrewe maatskappye deurdat dit kultivars net van kommersiële vrystelling af bestuur.

Die plantersregte word steeds deur die eienaar van die kultivar bestuur.

“Ons hoef dus nie kultivars te kry of te ontwikkel nie en het nie koste om die intellektuele eiendom van plantmateriaal te beskerm nie. Dit is meer kostedoeltreffend,” sê Ernst.

Hy sê omtrent 70% van die jaarlikse oesopbrengs van Maluma-avokado’s word reeds deur Maluma SA verteenwoordig. Dit is van 1 200 tot 2 000 ton avokado’s.

Die maatskappy laat ook ruimte vir toekomstige kwekers om nou al betrokke te raak en deel te neem aan die bestuur van hul toekomsbelange.

Daar is tans ’n wagtydperk van vyf jaar vir Malumabome vir nuwe aanplantings.

‘Ons hoef nie kultivars te kry of te ontwikkel nie en het nie koste daaraan verbonde om die intellektuele eiendom van plantmateriaal te beskerm nie.’