| Beterskap wink vir dié ‘pasiënt’
Westerse sanksies en die ineenstorting van oliepryse ná die Russiese inval in die Oekraïne in 2014 het die Russiese ekonomie ’n gevoelige knou toegedien. Daar is egter tekens dat dié “siek pasiënt” besig is om te herstel. Dit behoort goeie nuus vir Suid-Afrikaanse sitrusuitvoerders te wees, het mnr. Mikhail Fatejof (foto), Russiese konsultant vir die Suider-Afrikaanse Sitruskwekersvereniging, tydens die sitrusberaad in die Baai gesê.
Fatejof het ’n passievolle pleidooi gelewer vir groter samewerking tussen die twee lande en om sekere beperkings wat nog op sitrusuitvoer van toepassing is, opgehef te kry. Met die roebel se waarde wat sedert 2014 gehalveer het, en Russe wat reeds meer as 30% van hul inkomste (sowat VSA$500 per maand) aan voedsel bestee, sê hy inwoners was genoodsaak om minder en goedkoper kos te koop.
“My raad is om net soveel kos (sitrus) aan die ‘pasiënt’ te voorsien as wat hy kan verteer. Daar is reeds tekens dat die ekonomie besig is om te herstel. Met 150 miljoen inwoners en geen sitrus wat in Rusland verbou word nie, bly dit die wêreld se grootste invoerder van sagteskilsitrus, lemoene en pomelo’s, en die derde grootste invoerder van suurlemoene.”
Die verbruik per kop van sitrus in Rusland beloop meer as 11 kg per jaar en verteenwoordig sowat 15,5% van alle vrugteverbruik daar.
Hy het gesê Suid-Afrika is naas Egipte en Turkye die grootste verskaffer van lemoene aan Rusland en baie stewig in die mark gevestig. “Ons het egter nie net jul vrugte nodig nie, maar ook jul lojaliteit en ondersteuning om die moeilike omstandighede te bowe te kom.”
- THEUNS BOTHA