DIÉ AFHANKLIKES MAG OP PLASE WOON
PARLEMENTSLEDE wat beraadslaag oor wie wettig op plase mag woon, het eindelik ingestem tot ’n nuwe definisie van wie die wet as familie ag.
Kragtens die wysigingswetsontwerp op die uitbreiding van sekerheid van verblyfreg (Esta), is die definisie van familie nou as volg: ’n Bewoner se gade en/of gemenereggade; ’n Bewoner se kinders, insluitend aangenome kinders, pleegkinders en kleinkinders; ’n Bewoner se ouers en grootouers wat afhanklik is van hom/haar en wat saam met die bewoner op die grond bly; ’n Afhanklike word gedefinieer as ’n familielid wat die bewoner wetlik verplig word om te onderhou. Die DA het op ’n onlangse vergadering van die portefeuljekomitee vir landelike ontwikkeling en grondhervorming ingestem tot die aanvaarding van wysigings in die wetsontwerp op grond daarvan dat dié definisie van ’n afhanklike ingesluit word.
TE BREED?
Uit openbare verhore op voorgestelde wysigings verlede jaar het dit geblyk dat die aanvanklike nuwe definisie van plaasbewoners se afhanklikes só breed was dat dit sou kon inmeng met plase se produksie.
Mnr. Thomas Walters, die DA se skaduminister vir landelike ontwikkeling en grondhervorming, het gewaarsku ’n te breë definisie kan aan staatsliggame ’n skuiwergat oopmaak om hul diensleweringsverpligtinge op die plaaseienaar af te skuif.
Agri SA het gewaarsku teen ’n té oop definisie of ’n té breë kategorie van mense, want kommersiële plase is plekke waar goedere geproduseer word. Dit kan nie onbeperkte getalle mense huisves nie. Dit is dus van die uiterste belang dat boere duidelikheid het oor watter mense as die bewoner se familie beskou word.
Die vereniging vir landelike ontwikkeling (Afra) het gesê baie huishoudings beskou hulself as plaasbewoners hoewel geen van die familielede op die plaas werk waar hulle woon nie. Die meeste huishoudings bevat drie generasies familielede.
Die Esta-wysigingswetsontwerp is in September 2015 by die Nasionale Vergadering ingedien en sal later vanjaar weer voorgelê word vir goedkeuring. –
Plase is plekke waar goedere geproduseer word. Dit kan nie onbeperkte getalle mense huisves nie.