OESVERSEKERING KORT ’N HUPSTOOT
DIE SUID-AFRIKAANSE oesversekeringsbedryf is nie tans volhoubaar nie. Die poel van boere wat hul oeste verseker, is te klein, nuwe produkte is nodig, en die Regering moet, soos in baie ander lande, betrokke raak.
Dít was die boodskap van bedryfskenners op ’n simposium van die Nasionale Landboubemarkingsraad, die Landbounavorsingsraad en die Land Bank.
Volgens mnr. Maniki Rakgalakane, besturende direkteur van die Land Bank se versekeringsmaatskappy, het slegs 2% van kleinboere toegang tot die versekeringsmark. Net sowat 20% van kommersiële boere kan boonop die buitensporig hoë premies bekostig. Rakgalakane het gesê in Suid-Afrika het die bedryf ’n verliesverhouding van 114% – vir elke R1 wat uitbetaal moet word, word ’n verlies van R14 gely.
ELDERS
Rakgalakane het voorbeelde genoem van hoe ander lande oes- versekering volhoubaar maak: In Indië, Mexiko, Brasilië, Soedan en Marokko is boere verplig om hul oeste te verseker as hulle krediet wil uitneem. In Amerika en Spanje kry slegs boere wat oesversekering uitgeneem het, ramphulp. In Rusland, Brasilië, Japan, Turkye, Chili, Spanje en Colombia subsidieer die regerings premies om die koste daarvan te verlaag en só meer boere te kry om versekering uit te neem. In Amerika, Spanje en Turkye word standaarde vir prysbepaling en dekkingsvlakke gestel. Volgens mnr. Lovemore Forichi van Swiss Re (’n versekeringsmaatskappy) is die hoogste deelname aan oesversekering in dié lande waar regerings dit subsidieer.
Die paneel was optimisties dat Suid-Afrika ook oplossings gaan vind. Die Suid-Afrikaanse Vereniging van Versekeraars (SAIA), die Departement van Landbou, Bosbou en Visserye, en die Tesourie is tans in gesprek daaroor.
Mnr. Andries Mahlase van Munich Reinsurance, ook voorsitter van SAIA se landboukomitee, het gesê “die pad is nog lank”, maar landbouversekering moet spesifiek uitgesonder word in die landboudepartement se voorgestelde geïntegreerde ontwikkelingsbeleid.
KLEINBOERE
Die insluiting van kleinboere by versekering het baie bespreking uitgelok.
Mnr. Reinhard Kuschke, besturende direkteur van AgriSeker, het gesê dit sal nie werk om ’n produk vir kommersiële boere ook vir kleinboere te probeer gebruik nie. Boonop is die gehalte van data oor kleinboere se produksie swak.
Suid-Afrika moet gaan kyk wat ander lande doen. Boere kan byvoorbeeld teen ’n indeks soos ’n weerindeks verseker word.
Mnr. Muzi Dladla, ook van die Land Bank se versekeringsmaatskappy, het gesê in Kenia kan veeboere versekering teen ’n weidingsdroogte-indeks uitneem. Die indeks meet hoe groen die weiding is, en as daar ’n droogte is, word uitbetalings gemaak. Só word verseker diere word aan die lewe gehou.