SAMAGNIEANDERSE STORTINGSTERREIN WORD
DIE REGERING voer reeds samesprekings met die Europese Unie (EU) om vas te stel hoekom Europa nie hoenderborsvleis, wat gewild is onder verbruikers daar, van Suid-Afrika kan invoer nie, het mnr. Senzeni Zokwana, Minister van Landbou, Bosbou en Visserye, op ’n bespreking van die hoenderkrisis voor die Parlement se verantwoordelike portefeuljekomitee, gesê.
Hy het gesê die land blyk die stortingsterrein van verskeie lande, soos die EU en Amerika, te wees wat van hul “bruin” hoendervleis, oftewel hoender aan die been, ontslae wil raak. Dit vererger die druk waaronder die pluimveebedryf reeds is.
“Een van die probleme wat produsente in die gesig staar, is hoë produksiekoste. Tot sowat 75% van dit wat die kuikens vreet, kom van mielies en sojabone. Die ander probleem is die droogte.”
Hy het gesê besprekings is steeds aan die gang met die Departement van Handel en Nywerheid om die hoenderbedryf te help om verdere werksverliese te keer.
REGULERING
Verskeie parlementêre komitees vergader die afgelope weke met belanghebbendes in die hoenderbedryf om oplossings te vind vir die krisis wat hoofsaaklik weens die invoer van hoender uit die EU veroorsaak word. Die portefeuljekomitee vir handel en nywerheid het selfs openbare sittings oor die kwessie gehou.
Die Regering stem saam met die Suid-Afrikaanse Pluimveevereniging (SAPV) dat ’n reguleringsraamswerk daargestel moet word om hoenderstorting in die land te keer.
Mnr. Kevin Lovell, uitvoerende hoof van die SAPV, het aan die portefeuljekomitee gesê slegs hoender wat spesifiek vir Suid-Afrika geproduseer word, behoort ingevoer te word en nie dié van EU-lande wat hier van hul oorskot hoender ontslae wil raak nie.
WERKVERLIESE
Lovell sê hoenderstorting steel Suid-Afrikaners se werk.
“Ons kan nie bekostig dat ryk lande ons werk afvat nie. Hulle moet die gevolge van hul kosvoorkeure self dra. Ons wil soos gelykes handel dryf met die lande wat tans hoendervleis op ons mark stort.
“Ons kan ons taak slegs as afgehandel beskou as die totale invoer van hoendervleis met minstens die helfte gedaal het.”
Die handelsdrukgroep FairPlay wil hê dat die portefeuljekomitee vir handel en nywerheid belangrike kwessies onder loep sal neem: Om te bepaal wie bedryf die onwettige handelspraktyk van storting en hoe die skuldiges gaan vergoed vir die skade wat hulle veroorsaak. Watter stappe die Regering moet doen om storting te beëindig en hoe die Regering diegene wat hulle werk verloor het, gaan ondersteun.