MEGANISASIE: NUWE NEIGING MAAK WERK MAKLIKER
Elektronika en navigasie is die nuwe fokuspunt in die ontwikkeling van landboutegnologie. Saam daarmee loop die koppeling van verskillende stelsels en vereenvoudigde benutting van al hierdie moderne tegnologie vir die boer. Mnr. Ferdie Pieterse, uitvoerende bestuurder van Senwes Equipment, die landboumaatskappy Senwes se toerustingafdeling, sê die tegnologiese ontwikkeling van die afgelope jare was ten opsigte van binnebrandenjins en dieseltegnologie, brandstofinspuiting, ratkaste en die gehalte van enjinolie.
“Die nuutste neiging is ten opsigte van elektronika en navigasieprodukte. Dit behels ook die afwisselende toediening van stowwe met spuite en strooiers,” sê hy. “Die nuutste wat nou by Senwes ingestel word, is John Deere se JD Link-stelsel, waarvolgens produkte ingevolge telemetrie gemonitor word.”
Seine van werktuie en stelsels op die plaas word deur ’n beheerkamer in Klerksdorp verwerk, waarna Senwes-tegnici aanbevelings maak en probleme regstel.
Ferdie was op die meganisasiedag met demonstrasies wat Senwes op Nampopark buite Bothaville gehou het. Dit het oor twee dae meer as 1 200 besoekers gelok. Mnr. Kevin Lesser, bemarkingsbestuurder by John Deere in Suid-Afrika, het gesê die huidige brandpunt in tegnologie-ontwikkeling is die doeltreffende koppeling van die verskillende moderne tegnologiese aanwendings in ’n enkele stelsel.
Daar gaan nie noodwendig ’n toename in ingewikkelde stelsels wees nie, maar eerder die vereenvoudiging daarvan.
“Die nuwe tegnologie in die werktuie is kragtige stelsels wat in staat is tot vinnige algoritme-verwerking. Die kombinasie daarvan in verskeie stelsels beteken die vereenvoudigde benutting deur die produsent, wat die hooffokus van John Deere se ontwikkeling oor die volgende jaar is,” het hy gesê.
Een van die produkstelsels wat John Deere in Mei vanjaar op die Nampo-Oesdag wil bekend stel, is sy inligtingsentrum (JD Operations Centre) wat reeds vir Suid-Afrikaanse aanwending getoets word. Daarvolgens kan inligting van die werktuie en produksietoestande op die landerye via die sentrum produsente onmiddellik bereik, verskaffers in kennis stel en selfs ’n werktuigkundige ontbied voordat die boer besef dat sy werktuig meganiese probleme ondervind. Mnr. Matthew Barkas, gebiedsbestuurder vir die Britse werktuigvervaardiger JCB, het op die meganisasiedag voorspel dat die werktuie van die Suid-Afrikaanse boer binne die volgende drie jaar op dieselfde tegnologiese vlak as dié van die Europese verskaffers sal wees. Mnr. Steve Thurtell, medeeienaar van Falcon, sê sedert sy maatskappy in 2005 met die invoer van Amazone-toerusting begin het, het die tegnologievlak daarvan van meganiese kragaftakker-modelle gevorder tot hoogs gesofistikeerde werktuie wat by trekkerstelsels aanpas en outomaties vanuit die kajuit beheer word. “Dit is deesdae uiters belangrik dat ons tegnici ten volle opgelei word om die elektroniese, hidrouliese en meganiese aspekte van die moderne werktuie te hanteer,” sê hy.