WATERSLIM KAMELINA GOEIE DEKGEWAS
Kaliforniese landboukundiges meen kamelina, ook bekend as valsvlas, kan ’n nuttige dekgewas in die koeler deel van die jaar vir boere daar wees.
’n Span van die Universiteit van Kalifornië-Davis het die potensiaal van kamelina en kanola vir koelseisoen-gewasverbouing, van Oktober tot Junie daar, ondersoek.
Dié gebied se boere verkies oorwegend om warmseisoen-gewasse, van Maart tot Junie, te verbou.
Die landboukundiges het gevind koelseisoen-gewasse, soos kamelina en kanola, het die voordeel van minder waterverlies deur transpirasie uit die blare en verdamping uit die grond. Kalifornië kry tradisioneel die meeste van sy reënval in die koel seisoen. Hierdie gewasse kan dus regstreeks by dié waterbron baat.
Camelina sativa is lid van die familie Brassica. Dit is inheems aan Noord-Europa en dele van Sentraal-Asië, waar dit tradisioneel verbou word vir olie en veevoer. Die groeityd is kort, net 85 tot 100 dae. In ’n vroeëre studie vir die Waternavorsingskommissie oor biodieselgewasse is navorsingsresultate oor kamelina aangehaal wat wys dat dit 9% meer lewer as dit in die winter gesaai word, en met ’n herfsdekgewas opgevolg word, as daarsonder.
Kamelina-meel bevat 45% tot 47% ruproteïen en 10% tot 12% vesel, en is onder meer ’n gewilde voëlkos-bestanddeel.
Dit word, hoewel nie op groot skaal nie, in Duitsland, Pole, Rusland en Kanada verbou, waar dit as een van die nuwe spesialisgewasse van die toekoms beskou word.
Dit is veral geskik vir koeler klimate. Dit word beskou as redelik droogtebestand en meer rypbestand as ander oliesade, soos kanola, mosterd en vlas. – MARLEEN SMITH