Skadunet se kleur speel rol in avokado-gehalte
Hass-avokado’s wat onder blou en pêrelwit nette verbou word, lewer aansienlik beter uitpakpersentasies as wanneer dit sonder net of onder rooi nette verbou word, sê prof. Dharini Sivakumar van die departement plantwetenskappe aan die Tshwane Universiteit van Tegnologie.
Dit blyk uit navorsing wat Dharini en haar span in 2015 en 2016 gedoen het om die uitwerking van foto-selektiewe gekleurde skadunet op vruggrootte, bemarkbare opbrengs, sonbrand, windskade, rypwordpatrone en na-oesgehalte.
Sy sê die gehalte van avokado’s vir bemarking kan erg beïnvloed word deur hoë somertemperature, wind en soms hael.
“Die verhoogde oppervlaktemperatuur van vrugte en hoër sonbestraling kan sonskade tot gevolg hê en die uitpakpersentasie en bemarkbaarheid van vrugte erg benadeel,” sê Dharini. Verslae uit die bedryf wys dat blootstelling aan hoër temperature gedurende die groeifase variasies in rypwordpatrone en die fermheid van vrugte tot gevolg het.
Dit is waarom al hoe meer avokadokwekers daaraan dink om, soos sitrusboere met sitrus, avokado’s onder nette te verbou.
Dharini waarsku egter dat boere die belangrikheid van die nette se kleur en digtheid in ag moet neem wanneer hulle nette span. Dit speel ’n groot rol in die verandering van liggehalte wat deurgelaat word en die mikroklimaat onder die net.
Vir hul proefnemings in die Agatha-omgewing by Tzaneen het die span Gemm-avokadoboorde onder 20% rooi leno- en 20% pêrelwit leno-nette toegespan. Daar is ook ’n blok onder 20% blou nette en ook knittex-nette toegemaak vir vergelykingsdoeleindes en ’n kontroleblok is oopgelos.
Die 20% skadunet het deur die bank die bemarkbare opbrengste verbeter. Die uitpakpersentasie was egter aansienlik hoër in die blokke waar vrugte onder wit en blou nette gelewer is. Met die 2016-oes het daar veral meer vrugte van geskikte groottes vir kommersiële markte onder blou nette uitgekom, met wit nette ’n kort kop agter. Vrugte wat in oop boorde sonder bedekking gelewer is, was oor die algemeen kleiner in albei oesjare.
Dharini sê vrugte wat onder die blou nette en in die oop boorde geoes is, het vinniger ryp geword as vrugte wat onder die ander nette gelewer is, terwyl die rypwordproses van die vrugte wat onder die rooi nette gelewer is, aansienlik vertraag is.
Verdere navorsing word nou gedoen om te sien watter invloed nette op die rakleeftyd van avokado’s het. “As ons ’n produk van ’n beter gehalte met net twee dae langer rakleeftyd kan lewer, is dit al die moeite werd,” sê mnr. Jannie Lombard, ’n avokadokweker van Tzaneen op wie se grond die proefnemings gedoen word.