PEGG-WIEL STEEDS SLEUTEL TOT VERBOUING VAN AVO’S
’n Geïntegreerde bestuursplan is die enigste manier om Phytophthora (wortelvrot) in avokado’s te bestuur, sê dr. Elizabeth Dann van die Universiteit van Queensland in Australië se vereniging vir landbou- en voedselvernuwing.
Sy sê die sukses van die avokadobedryf in Suid-Afrika en Australië kan toegeskryf word aan die navorsing en ontwikkeling van sulke geïngegreerde bestuursopsies vir wortelvrot. ’n Deel van hierdie bestuursopsies sluit die gebruik van fosfonaat as swamdoder in.
Sy sê hoewel net 3% van die Australiese avokado-oes jaarliks uitgevoer word, voer Suid-Afrika op groot skaal avokado’s uit na Europa waar die maksimum residuvlakke (MRL) vir fosfonaat by avokado’s 50 mg/kg is, met party handelaars wat aandring op minder as 20 mg/kg.
“In Australië is ons MRL vir fosfonaat 500 mg/kg. Daar is dus druk op SuidAfrika se avokadokwekers om die gebruik van fosfonaat te beperk.”
Die plantpatoloog mnr. Ken Pegg het reeds in die 1970’s ’n gebalanseerde bestuursprogram vir avokado’s met sy Pegg-wieldiagram voorgestel.
Die sleutelelemente behels dat ’n mens oordeelkundig kies waar om avokadoboorde te vestig en grond dan voorberei om voldoende dreinering te bied sodat water nie in die wortelomgewing opbou nie.
Dunn stem saam met Pegg en sê ’n mens moet onderstamme kies wat gehard is teen wortelvrot, soos Dusa, Bounty en Velvic. Sy beveel ook aan dat avokadokwekers bome plant wat vry is van Phytophthora. “Kies kwekerye met ’n goeie reputasie daarvoor.”
Sy sê die bywerk van kompos en ’n goeie deklaag verbeter grondstruktuur, bevorder wortelontwikkeling en stimuleer mikrobiese aktiwiteit wat Phytophthoraspore bestry. Dunn beveel ook optimale besproeiingsbestuur en plantvoeding aan wat kalsiumaanpassing insluit om wortelvrot te onderdruk en silikon om boomgesondheid en vruggehalte te bevorder.
Die laaste speek in die wiel is die verantwoordelike gebruik van chemikalieë, soos fosfonaat en metalaksiel, waarvan die gebruik ondersteun moet word deur wortel- en vrugresidu-ontleding.