Yara belê R30m. in aanleg
DIE KUNSMISVERVAARDIGER Yara International het ’n nuwe aanleg wat vloeibare kunsmis vervaardig, op Malmesbury geopen. Dié aanleg van R30 miljoen vervang ’n bestaande fabriek op Moorreesburg. Volgens die maatskappy se bestuur sal dit Yara in staat stel om sy teenwoordigheid in Suider-Afrika aansienlik uit te brei.
Die nuwe aanleg het ’n produksievermoë van meer as 200 ton en sal gewasspesifieke produkte maak vir die produksie van graan, groente, vrugte en druiwe.
Volgens mnr. Danie van der Merwe, bestuurder van gedif- ferensieerde produkte by Yara, moes die Moorreesburg-aanleg gemoderniseer word. Daar is besluit om die nuwe aanleg eerder op Malmesbury te bou omdat dit meer sentraal geleë is vir graanboere in die gebied. Die nuwe aanleg sal ook in die toekoms uitgebrei kan word.
Van der Merwe sê daar was in die afgelope jare ’n groot wegbeweeg van vastestof- na vloeibare kunsmis in die graanbedryf omdat dit makliker is om laasgenoemde toe te dien en dit doeltreffender is. Hul produk bespaar die boer ook tyd en geld omdat boere nie self die kunsmis hoef te meng nie.
Die maatskappy verbeter en verfyn gedurig sy produkte danksy navorsing wat hy met die samewerking van die Universiteit van Stellenbosch doen. Hy samel ook deurlopend data in oor hoe gewasse in spesifieke toestande reageer en pas dan sy produkte en toedienings daarvolgens aan. Mnr. Terje Knutsen, adjunk- uitvoerende voorsitter vir plantvoeding by Yara, het gesê die belegging bevestig Yara se verbintenis tot die ontwikkeling van die Suid-Afrikaanse landbou.