Skandaal raak straks net SA deli-produkte

DIE PLAASLIKE bedryf vir verwerkte hoenderprodukte sal die meeste geraak word deur Suid-Afrika se beperking op die invoer van vleisprodukte vanaf sekere Brasiliaanse aanlegte.

Sowat 42% van ingevoerde pluimveeprodukte het verlede jaar uit Brasilië gekom. In verlede jaar se laaste kwartaal was meer as 70% daarvan bevrore, meganies ontbeende hoendervleis wat plaaslik in verwerkte produkte gebruik word.

’n Skandaal het die Brasiliaanse vleisbedryf middel Maart getref nadat die polisie daar bekend gemaak het hy ondersoek beweerde omkopery van amptenare wat daartoe kon gelei het dat bederfde hoender- en beesvleis van 21 verwerkingsaanlegte uitgevoer is.

Mnr. Kevin Lovell, uitvoerende hoof van die Suid-Afrikaanse Pluimveevereniging (SAPV), sê alle geprosesseerde hoendervleisprodukte in Suid-Afrika kan in ’n stadium Brasiliaanse, meganies ontbeende vleis bevat, maar verbruikers sal nooit weet wat die oorsprong van die meganies ontbeende vleis in sulke produkte is nie.

Ingevoerde Brasiliaanse agterkwarte sal volgens hom waarskynlik eerder in plaaslike supermarkte se slaghuisafdelings as in hul vrieskaste verkoop word.

Supermarkgroepe het in mediaberigte gesê hulle het baie min Brasiliaanse produkte op hul rakke.

NOG AANLEGTE

Lovell sê dit is nog te vroeg om te kan raam wat die invoerbeperking se invloed in ton kan wees.

“Ons gaan nog die volume van die betrokke aanlegte na. Daar is baie ander aanlegte in Brasilië.

“Suid-Afrika se invoerbeperking is net op die aanlegte wat ondersoek word, waarvan drie toegemaak is.

“Die Departement van Landbou, Bosbou en Visserye het besluit om ’n versigtige benadering te volg, wat die risiko beperk sonder om handel erg te belemmer.”

Lovell sê as die invoerbeperking ’n groot invloed het, sal dié invoer waarskynlik met produkte uit die Europese Unie vervang word.

MEER TOETSE

Sommige lande het onmiddellik ’n algehele verbod op Brasiliaanse hoender ingestel, maar van hulle, soos China, het dit intussen weer opgehef om, soos Suid-Afrika, net produkte van die betrokke aanlegte te verbied.

Suid-Afrika het Brasilië vir ’n lys gevra van die aanlegte wat ondersoek word en ook gevra dat uitvoer vanaf daardie aanlegte verbied word totdat die kwessie tot die tevredenheid van die Suid-Afrikaanse veterinêre owerheid opgelos is.

Suid-Afrikaanse amptenare by toegangspunte tot die land moet nou elke houer vleis uit Brasilië volgens bestaande beleid toets.

Volgens die Rooivleisprodusente-organisasie (RPO) voer Suid-Afrika reeds ’n geruime tyd geen skaap- en beesvleis van Brasilië in nie. Die organisasie het die departement gelukgewens met “vinnige en doeltreffende optrede” ná die vleisskandaal. “Dit is verblydend dat die twee lande se veterinêre owerhede so goed saamwerk en doeltreffend kommunikeer.”