VERBRUIKERS WIL GESOND PEUSEL
Die vraag na springmielies groei wêreldwyd omdat verbruikers dit as ’n gesonde versnapering beskou. Me. Nadia van der Colff, ’n navorser oor verbruikersgedrag, het op Standard Bank Agribesigheid se jaarlikse inligtingsvergadering op Centurion gesê internasionale springmielieverkope sal na verwagting van 2016 tot 2020 met meer as 40% groei.
In Suid-Afrika is dit een van die peuselhappie-kategorieë wat die vinnigste groei toon – veral die springmielies wat met sout geurmiddels gegeur is. Van der Colff het gesê dit is vir verbruikers belangrik hóé die springmielies gegeur is. Daar is ’n neiging om glutenvrye en natuurlike geurmiddels, asook dié met ’n lae soutinhoud, te verkies.
Volgens mnr. Wandile Sihlobo, landbou-ekonoom van Agbiz, word Suid-Afrika se springmielies hoofsaaklik in besproeiingsgebiede in die Vrystaat en Noord-Kaap verbou en is die jaarlikse produksie na raming sowat 55 000 ton. Die meeste saad word uit Amerika ingevoer. Sowat 40% van Suid-Afrikaans geproduseerde springmielies word na Botswana, Namibië, Lesotho en Swaziland uitgevoer.
“Suid-Afrika se springmieliemark is nog nie goed ontwikkel nie,” sê Sihlobo. “Dit is noodsaaklik dat landboukundiges meer inligting oor dié gewas insamel sodat boere ’n beter begrip van toekomstige geleenthede kan hê.
“Met veranderinge in verbruikersvoorkeure en die groeiende wêreldvraag na springmielies behoort Suid-Afrika moeite te doen om dié mark te ontgin.”