KAN DIÉ SYFERS GESTAAF WORD?
In ’n artikel in Beeld van 18 Maart (“Ete met Omri: ‘Plaasaanvalle ken geen kleur’ ”), sê mnr. Omri van Zyl, uitvoerende hoof van Agri SA, plaasaanvalle ken geen kleur nie en hy maak ondeurdagte stellings wat nie net daar gelaat kan word nie.
Indien ek vandag ’n lid van Agri SA was, sou ek ’n baie bekommerde man gewees het. Omri meld in die onderhoud dat daar meer plaaswerkers as boere in plaasaanvalle vermoor word. Ek versoek hom om die name, datum, tyd en plek per geval bekend te maak om dit te staaf.
Sover ek verstaan, beskik die TLU SA oor plaasaanvalstatistieke wat hy sedert 1990 byhou. Vrystaat Landbou het ook die afgelope paar jaar statistieke begin byhou. Soos ek verstaan, word aanvalle op plase in albei gevalle ongeag kleur aangeteken volgens ’n definisie wat deur die Nasionale Prioriteitskomitee vir Landelike Beveiliging vasgestel is. Luidens die TLU SA se statistieke wat bygehou word vir alle plaasaanvalle in Suid-Afrika sedert 1990 is daar 1 648 wit mense op plase vermoor en 231 swart mense.
Die aantal wit kommersiële boere is ongeveer 34 000, terwyl daar 750 000 plaaswerkers is.
As hy dié statistieke nie eens reg het nie, hoe gaan Omri met ander belangrike sake in die landbou om?
Hy maak verder daarop aanspraak dat Agri SA 28 000 boere verteenwoordig. Sou hy bereid wees om ’n onafhanklike oudit oor die getal lede te laat doen om vas te stel hoeveel ingeskrewe, opbetaalde lede Agri SA werklik het? My kommer is dat hy die lede van die onderskeie bedryfsorganisasies wat by die bedryfskamer geaffilieer is, ook byvoeg as Agri SA lede. Só word mense meer as een keer getel.
Die werklikheid is dat Agri SA hard probeer om die beleid van die Regering aan die boere te verkoop, terwyl die TLU SA probeer om die boere se belange by die Regering te bevorder. Natuurlik sal Agri SA dan die gunsteling by die Regering wees. Selfs in sy gunstige posisie kan Agri SA en geen ander instansie waarborge gee dat elke boer oor 10 jaar nog sy titelaktes gaan hê nie. Sy gepraat en ondersteuning van die Regering het vir geen boer nog enige gunstige oplossing gebring nie.
Die stryd in die ANC is op kort termyn ’n geleentheid wat effens beweegruimte bied. Suid-Afrika moet besef dat ons iewers die keuse sal moet maak tussen kapitalisme en sosialisme of kommunisme, soos deur pres. Jacob Zuma in die openbaar gesê is. Laasgenoemde sal private besitreg en die vryemarkstelsel in die gedrang bring en ekonomiese groei demp.
Landbouers moet opstaan, standpunt inneem en seker maak dat organisasies in die belang van die landbou en die boere optree.