SLAAIMARK VERLEP VINNIG

Die slaaibedryf is tans onder die meeste druk in baie jare, volgens boere en verpakkers. Mnr. Rudi Engelke, ’n groenteboer van die Kaap, is senuagtig oor gekontrakteerde slaaiverskaffers se verdienste by kettingwinkels. “Die prys vir kropslaai is ver onder die produksiekoste, maar tans verdien ons ’n hoër inkomste per kropslaai by die kettingwinkels as die prys wat op varsproduktemarkte behaal word. Dit kan daartoe lei dat supermarkte hul pryse ook afwaarts aanpas.”

Volgens mnr. Ian Grummbacher, ’n direkteur van die landwye slaaiverpakker en verspreider Dew Crisp, is die bedryf onder groot druk. “Tans is produksie normaal, maar die vraag na alle slaai is laag, wat druk op die prys plaas.

“Daar is genoeg slaai aangeplant vir die winter en die warm weer sal verseker dat produksie goed bly, tensy iets soos hael of swartryp iewers ’n oes vernietig. Daar is dus nie ’n vooruitsig dat die prys van slaai in die winter sal herstel nie. Boonop lê daar verdere swarigheid in September tot November voor. Tradisioneel is daar ’n ooraanbod in daardie maande. Vanjaar, met die goeie voorraad water in die noorde van Suid-Afrika, stuur dit weer af op oorproduksie.

“Ek meen die ekonomiese agteruitgang van die land is nog nie ten volle gekwantifiseer nie. Die varsproduktemarkte is van die eerste plekke waar ’n mens dié neiging waarneem. Alle vars produkte se pryse is onder druk – meer weens ’n swak ekonomie as ’n ooraanbod. Daar lê dus ’n moeilike tyd vir groenteboere voor,” sê Grummbacher.