Bielie van ’n mielie-oes
Die Cronjés van die plaas Emmerentia het met slim besluite en Pannar se hulp ’n goeie mielie-oes opgelewer.
Emmerentia lê tussen Standerton en Vrede. Dit is goeie mielie- en beeswêreld. Die Cronjé-familie boer met beeste, braaihoenders, skape en gewasse, soos sojabone, wit en geel mielies. Christo staan aan die stuur van die gesaaides. Hy boer saam met sy broer, Abrie, en neef Jaco.
As kontantgewas en voerbron hang baie van die boerdery se sukses af van hoe goed Christo die gesaaides bestuur.
“Vanjaar het ons ’n goeie gemiddelde reënval gehad, en dié reën het op die regte tye geval. Vir ons droëlandproduksie het die weer mooi saamgespeel. ’n Paar van ons landerye is onder besproeiing,” sê Christo.
As deel van die risikoverspreiding gebruik Christo ’n basterpakket op aanbeveling van mnr. Jan Saaiman, verkoopsverteenwoordiger van Pannar in die Standerton-distrik.
“Ons het so vyf jaar gelede ons bewerkingsmetodes na strookbewerking aangepas. Die grondstruktuur het verbeter en ons gebruik grondontledings om die hoeveelheid bemesting en kalktoediening te bepaal. Die mikpunt is om die grond se pH reg te kry op tussen 5,5 en 6,5. Bemesting word ook voor planttyd toegedien. Vir siektebestryding span ons die Yieldboost®-swamdoderprogram in.”
Planttyd pas aan by die reënval en verwagte weervooruitsigte. Dit is gewoonlik tussen 10 Oktober en 10 November. ’n Fyn saadbedding word voorberei en grondbewerking is slegs 200-300 mm diep.
“Ek kyk nie terug nie. Strookbewerking werk vir ons. Ek ervaar minder wielglip en verdigting tydens bewerking,” sê Christo.
BG 3492B
Dié geel mielie is ’n ultravinnige baster en kan ’n baie hoë opbrengs onder besproeiing lewer. Christo plant dié baster aan teen die hoogste aanbevole stand van 100 000 plante per hektaar met ’n rywydte van 76 cm. Die tydperk van plant tot stroop is sowat 180 dae. “Ons mikpunt is om ’n oes van sowat 18 ton/ha te behaal. Die afgelope seisoen is 19,1 ton/ha gemiddeld by ’n spesifieke spilpunt gestroop.” Met só ’n hoë plantestand en onder besproeiing is dit wel moontlik om met ’n enkelkoppige mielie, soos BG 3492B, sulke syfers te behaal. Die oes kan selfs die kerf van 20 t/ha bereik.
BG 3792BR EN BG 3492B
Onder droëlandverbouing maak BG 3492B weer sy buiging. In sy geelbasterpakket gebruik Christo ook BG 3792BR. Albei is in die ultravinnige groeiklas, enkelkoppig en is geskik as weimielies en vir kuilvoerproduksie.
“Ons het begin kyk om opbrengste onder droëlandverbouing te verbeter. Vanjaar het ons ’n hoër plantpopulasie aangeplant as die aanbevole digtheid. Na gelang van die grondpotensiaal plant ons teen ’n stand van 50 000 plante (lewer 10 ton/ha tot 12 ton/ha na gelang van grondtipe), 60 000 plante (lewer 13 ton/ha) en 70 000 plante (lewer 13,6 ton/ha).”
“BG3792BR en BG3492B behou hul kopgrootte. Die plantestand kan dus aanpas by landerye se grondpotensiaal.”
PAN 5R-791BR EN PAN 4B-311B
Jan sê met inagneming van die rywydte van 76 cm wat Christo verkies, die streek en opbrengsvereistes, het hy PAN 5R-791BR en PAN 4B-311 vir die witbasterpakket aanbeveel. Die witbasterpakket is bekend om sy uitmuntende prestasie en stabiliteit. PAN 5R-791BR is in die mediumvinnige groeiklas en is ’n sterk meerkoppige wit mielie. PAN 4B-311B is ’n enkelkoppige, vinnige groeier met ’n goeie staanvermoë.
“Albei is teen 48 000 plante per hektaar aangeplant,” sê Jan. “Die mikpunt is om 10 t/ha te stroop, maar die verwagting vanjaar is ’n opbrengs van 8 t/ha. Ons kyk daarna om die bemesting aan te pas.”
Christo sê hulle doen baie plantestandproewe om die regte resep vir elke landery te kry. “Ons het proefstroke waar ons tot 100 000 plante per hektaar op droëland plant om die potensiaal te bepaal. Ek sit eerder met 80 000 kleiner mieliekoppe as met 30 000 koppe van gemiddelde grootte.”