Behou jou plaasbestuurder

Indien jong mense ná hul studies op ’n plaas prakties gedoen het en die boer hulle graag permanent in diens wil stel (inaggenome dat hulle dalk dalk later gaan trou), is daar opsies wat vir albei partye voordelig is.

Dit bly moeilik vir boere om hul bestuurders te behou. Ek verwys nou na jong manne wat hul studies aan ’n universiteit of landboukollege voltooi het en dan hul prakties onder die mentorskap van ’n boer doen. Die werklikheid is dat hierdie jong manne in die fleur van hul lewe en pas afgestudeer is. Hulle is ook in die seisoen van hul lewe waar hulle waarskynlik kort voor lank voor die kansel sal staan. En saam met die huweliksmaat kom nuwe finansiële verantwoordelikhede. Nie lank nie, dans al die paartjie met ’n gesin wil begin. Dit is weer ’n ander tyd in hul lewens.

Maar hoe gemaak as die boer graag ’n bestuurder se dienste wil behou? ’n Boer maak ’n plan, lui die spreekwoord, maar wat is die plan hier?

’n Moontlike oplossing is’ n voorkeur vergoedings plan wat die bestuurder ekstra vergoed indien hy byvoorbeeld vyf jaar lank in diens bly.

VERGOEDINGSPLAN

Die werkgewer (boer) verhoog die werknemer (bestuurder) se salaris om die werknemer in staat te stel om ’n beleggingspolis op sy eie lewe uit te neem. Die werkgewer betaal die premie gewoonlik regstreeks aan die versekeraar en die partye kom ooreen dat die werknemer minstens vir ’n termyn van vyf jaar vir die werkgewer sal bly werk.

Die werknemer teken dan ’n sekuriteitsessie ten gunste van die werkgewer, en gee sodoende sekuriteit dat hy vir die ooreengekome termyn van vyf jaar sal bly. Wanneer die vyf jaar verby is, kanselleer die werkgewer die sekuriteitsessie. Die werknemer word dan weer die volle eienaar van die opbrengs van polis en hy word nie meer deur die sekuriteitsessie beperk nie.

VERPLIGTINGE

’n Kontrak word gewoonlik saam met die polis deur die versekeraar se regsadviseurs opgestel. Indien die werknemer nie sy verpligtinge nakom nie, het die werkgewer verskeie opsies. Een opsie is om die polis tot sy eie voordeel te behou. Daar word dus kontraktueel ooreengekom wat sal gebeur. Die werkgewer word deur die sekuriteitsessie beskerm terwyl die termyn nog aan die gang is.

Indien die werknemer nie vir die volle termyn aanbly nie, kry die werkgewer regte op die polis omdat die werknemer nie sy deel van die kontrak nagekom het nie.

BELASTINGGEVOLGE Inkomstebelasting

Die salarisverhoging is ’n aftrekbare uit gawe vir die werkgewer ingevolge artikel 11( a) van die Inkomste belastingwet (Wet 58 van 1962). Die salarisverhoging word belas in die hande van die werknemer. Dit is dus belangrik dat die werknemer se salarisverhoging die premie van die polis, asook die ekstra inkomstebelasting daarop, insluit sodat hy dieselfde salaris kan verdien. As die termyn verby is, word die sekuriteitsessie gekanselleer, en die werknemer ontvang die opbrengs van die polis belastingvry (aangesien die belasting reeds binne-in die fonds betaal is).

Boedelbelasting

Die polis is ’n geagte bate vir die doeleindes van boedelbelasting in die werknemer se boedel.

Kapitaalwinsbelasting

Daar is geen kapitaal winsbelasting gevolg op die opbrengs van die polis vir die werknemer as die werknemer die kontraktuele vereistes nakom en vir die ooreengekome tydperk in die werkgewer se diens bly nie.

GEVOLGTREKKING

Indien u ’n boer met ’n plan wil wees om ’n plaasbestuurder te behou, moenie die voordele van’ n voorkeur vergoedings plan miskyk nie!

Kontak u finansiële adviseur en onthou die kontrak wat hand aan hand gaan met dié plan.

Suzelle Jooste is ’n regsadviseurbestuurder by Old Mutual Makelaardienste.