SOJA SKITTER
SUID-AFRIKA se nasionale sojaboonoes kan volgens die jongste amptelike raming 1,34 miljoen ton behaal, die grootste in die geskiedenis.
Die vorige rekord-sojaboonoes was 1,07 miljoen ton, wat in 2015 van die lande gehaal is. Verlede jaar is net 742 000 ton sojabone weens die droogte verbou.
Vanjaar se skitterende oes beteken Suid-Afrika kan ’n netto uitvoerder van sojabone word, sê mnr. Wandile Sihlobo, ekonoom by die landbou-sakekamer Agbiz.
Hy meen die uitvoer van sojabone kan hierdie bemarkingseisoen 30 000 ton haal, maar wys daarop dat Suid-Afrika steeds ’n netto invoerder van sojaboon-oliekoek en -olie is.
Die Oesskattingskomitee het in sy jongste raming die verwagte sojaboonoes met amper 9% vanaf sy Mei-skatting verhoog. Dit word hoofsaaklik aan uitgebreide aanplantings en groter opbrengste as wat aanvanklik verwag is, toegeskryf.
Die jongste verwagte gemiddelde opbrengs is 2,34 ton per
ha. Die beraamde aanplantings is 573 950 ha wat 14% meer as verlede jaar is.
ÁL MEER SOJA
Dit vorm deel van ’n jare lange neiging waarin Suid-Afrikaanse mielie-hektare met soja-aanplantings vervang word, soortgelyk aan wat in Amerika aan die gebeur is.
Die Proteïennavorsingstigting (PNS) meen Suid-Afrikaanse soja-aanplantings kan teen 2020 1 miljoen ha haal, die gemiddelde opbrengs 2,5 ton per ha en die nasionale oes 2,5 miljoen ton.
Sihlobo sê die verhoogde sojaboonproduksie word deur ’n sterk vraag in die veevoermark
aangedryf, wat op sy beurt deur die plaaslike groeiende middelklas se behoefte aan proteïen aangevuur word.
Die Oesskattingskomitee het die verwagte mielie-oes onveranderd op 15,631 miljoen ton gelaat, met ’n verwagte gemiddelde opbrengs van net onder 6 ton per ha. Dit is ook ’n nuwe rekord sedert 1981 se 15,03 miljoen ton, toe die gemiddelde opbrengs 3,05 ton per ha was.
Die sonneblomsaadoes is met amper 4% tot 821 970 ton verminder. Die verwagte nasionale opbrengs is 1,29 ton per ha.
Die verwagte grondboonoes is met amper 5% tot 90 550 ton verhoog.