Appletiser kan produksie verdubbel
DIE bekende Appletiser-aanleg op Grabouw sal na verwagting sy jaarlikse produksie teen Oktober kan verdubbel ná hy in die koeldrankmaatskappy Coca-Cola Beverages SA se voorsieningsketting geïntegreer is.
Buiten die vonkel-vrugtesap, soos Appletiser en Grapetiser, waarvoor Appletiser SA bekend is, gaan dié aanleg nou ook ander Coca-Cola-produkte vervaardig.
Dit volg ná ’n samesmelting van die Coca-Cola Company met ’n deel van SABMiller en Gutsche Family Investments in Mei verlede jaar. Die nuwe entiteit heet Coca-Cola Beverages SA (CCBSA).
Die Regering het streng voorwaardes aan dié transaksie gekoppel. Minstens 80% van die appels, pere, druiwe en ander vrugte wat in sapkonsentraat gebruik word, moet plaaslik verbou word. Sedert die samesmelting in Mei verlede jaar het Appletiser se kontraktuele verpligting om plaaslike druiwe vir sy Grapetiser-produk te gebruik, van 11% tot 43% gestyg. Dit sal in komende jare aanhou styg.
Verder moet die maatskappy minstens 20% swart aandeelhouding hê, geen werkgeleenthede afstaan nie en boere en ander verskaffers help ontwikkel. Mnr. Velaphi Ratshefola, besturende direkteur van CCBSA, sê die plan is om produksie te verhoog en produkte na die res van Afrika uit te voer.
Twee nuwe swart aandeelhouers is op ‘n bekendstellingsgeleentheid aan mnr. Ebrahim Patel, Minister van Ekonomiese Ontwikkeling, voorgestel. Hulle is die African Pioneer-groep, wat 17,5% aandeelhouding in Appletiser SA gekoop het, en mnr. Sipho Madlala, wat vir 20 jaar reeds by die maatskappy verbonde is en ’n 4%-aandeel bekom het.
Patel het op dié geleentheid benadruk dat die tekort aan swart boere omgekeer moet word.