NUWE KORINGTARIEF BRING SOET ÉN SUUR
’N TARIEF van R947,21 per ton op ingevoerde koring is op 23 Junie afgekondig. Dit is ’n verlaging van R242,98/t teenoor die vorige tarief van R1 190,19/t.
Die aankondiging volg op ’n hersiening van die manier waarop die tarief bereken is, soos deur die Minister van Finansies in April 2016 aangevra.
Volgens Perspektief, Graan SA se weeklikse nuusbrief, moes dié organisasie weer met ’n regsproses begin om die koringtarief af te dwing.
Die veranderlike formule bly van toepassing, maar twee van die veranderlikes, die verwysingsprys en wisselkoers, is aangepas. Die verwysingsprys is verlaag van $294/t tot $279/t. Om voorsiening te maak vir die uitwerking van inflasie of ongunstige wisselkoersskommelinge gaan die Kommissie vir Internasionale Handelsadministrasie (Itac) voortaan die reële effektiewe wisselkoersindeks gebruik, soos dit deur die Suid-Afrikaanse Reserwebank bekend gemaak is.
Perspektief van 23 Junie meld die tarief kan in die nabye toekoms afwaarts aangepas word weens internasionale prysstygings.
‘GEMENGDE GEVOELENS’
Mnr. Andries Theron, voorsitter van die Suid-Afrikaanse agentskap vir kultivar- en tegnologie-ontwikkeling (Sacta) en boer van Moorreesburg, sê hy het gemengde gevoelens oor die tarief. “Ek is bitter dankbaar dat die tarief daar is, ek is gemaklik met die vlak van die tarief en verlig dat die veranderlike formule behou het.”
Hoewel hy bly is dat Itac nie toegegee het aan versoeke dat die gemiddelde wisselkoers oor vyf of tien jaar in die berekening van die tarief gebruik word nie, is dit jammer dat boere nou reeds met die wisselkoers ‘beboet’ word.
‘Die tarief kan in die nabye toekoms afwaarts aangepas word weens internasionale prysstygings.’
Hy meen die indekswaarde moes een wees vir hierdie ronde en kan daarna aangepas word.
Hy dink nie mense besef regtig in watter benarde posisie boere in die koringsaaigebiede is nie. Hy beskou dit as ’n tragedie dat die koringbedryf in Suid-Afrika oorleef op veranderlikes buite die landbou, soos die tarief op ingevoerde koring, wisselkoers en die feit dat die invoerpariteitsprys geld omdat die land ’n netto invoerder van koring is.