Droogte-impak is verreikend

AS die droogte in die Wes-Kaap nie gou gebreek word nie, kan dit die langtermyngroei van die provinsiale en nasionale ekonomie benadeel.

Só sê mnr. Dawie Maree, inligting-en-bemarkingshoof by FNB Landbou.

Die provinsie is ’n groot uitvoerder van landbouprodukte, soos sagtevrugte, wyn en toenemend sitrus.

Die landbou dra sowat 4% tot die bruto binnelandse produk (BBP) van die Wes-Kaap by en dié provinsie 24% tot die nasionale BBP.

Maree sê die landbou en voed- selverwerking sorg vir 18% van die provinsie se werkgeleenthede en die droogte gaan seisoenale werkgeleenthede in die vrugtebedryf erg raak.

Die eerste kwartaal van vanjaar se 215 000 werknemers in die Wes-Kaapse landbousektor was 14,2% minder as in die vorige kwartaal, en 5,9% minder as ’n jaar gelede.

Ofskoon Suid-Afrika ’n netto-invoerder van koring is, bestaan die moontlikheid dat laer koringopbrengste in dié provinsie groter koring-invoer sal noodsaak, wat koringpryse kan laat styg. –

HOOP VIR VEEBOERE

Agri Wes-Kaap samel nog onverpoos veevoer en geldelike skenkings in vir boere wat gebuk gaan onder droogte, asook vir Suid-Kaapse boere wat hul weiveld in verlede maand se wegholbrand verloor het. Dié vrag veevoeris deur boere van die Stanford-omgewing in die Overberg geskenk en is kort voor druktyd in die Koo en die Plettenbergbaai-omgewing afgelaai.