BOKHAAR | Lae pryse kry boere nie onder

Kom wat wil, hardkoppige boere sal aanhou om bokhaar te lewer, want op elke Karooplaas is daar ’n leegte met doringbome.

Só het mnr. Andries Greeff, voorsitter van die Suid-Afrikaanse Sybokhaarkwekersvereniging (SASKV), sy medeboere in sy voorsittersrede op die vereniging se onlangse jaarkongres op Graaff-Reinet bemoedig.

Hy het verwys na die daling van 24% in die prys van bokhaar gedurende die winterseisoen. Ofskoon pryse marginaal in die somerseisoen verbeter het tot R190,30/kg, spook boere met ’n ernstige droogte wat produksie reeds met 8% laat tuimel het.

Volgens Greeff was verlede jaar se prysregstelling op die mark baie groter as verwag. “Dit het álmal — produsente, kopers en makelaars — onverhoeds betrap en ons het almal geld verloor. Die voer van bokke om hulle in produksie te hou, het boere se kontantvloei onder verdere druk geplaas. Ofskoon dit bemoedigend is dat die prys van grootbokhaar gestabiliseer het, is die prys van kleinbokkiehaar nog gans te laag.”

Greeff het ’n beroep op sy medeboere gedoen om nie handdoek in te gooi nie. As hulle neerslagtig raak, moet hulle met mekaar praat. “Praat met jou vrou, jou buurman, enigiemand. Doen meer as hoor — luister. Doen meer as praat — sê iets vir mekaar. Die reën sal weer kom en daarmee saam sukses.”