WOL | Beurs ‘sal nie tot prysmanipulasie lei’

Vrese dat die termynkontrak vir Merinowol op die JSE, wat onlangs deur Cape Wools bekend gestel is, tot prysmanipulasie van dié vesel kan lei, is in wolgeledere besweer.

Dit volg nadat mnr. Petrus de Wet, ’n voormalige voorsitter van die Nasionale Wolkwekersvereniging (NWKV), op Facebook sy kommer uitspreek het dat die afgeleide instrument op die JSE om wolboere teen markskommelinge te verskans, ’n geleentheid vir prysmanipulasie kan skep.

De Wet wou ook weet of Cape Wools voor die aankondiging die hulp van kundiges ingeroep het om te bepaal of die termynkontrak in belang van wolboere is en of die NWKV vooraf oor die besluit geraadpleeg is.

Mnr. Guillau du Toit, voorsitter van die NWKV, erken dié organisasie is nie vooraf geraadpleeg nie. “Dit was ’n besluit van Cape Wools wat op die NWKV se onlangse jaarkongres in Port Elizabeth bekend gemaak is. Ons gaan ’n onafhanklike konsultant nader om ’n ingeligte mening oor dié saak te gee.”

Hy sê die NWKV sal sy lede volledig oor die werking van die termynkontrak inlig en oplei.

Mnr. George de Kok, voorsitter van Cape Wools, het gesê omdat wol nie fisiek op die beurs sal verhandel nie, sal dit geen nadelige invloed op wolpryse hê nie. Dit is slegs ’n afgeleide instrument wat op Cape Wools se markaanwyser gegrond is.

“Die produk is dus nie ’n bemarkingsgeleentheid vir boere of wolkopers nie, maar bloot ’n instrument om hulle teen prysskommelinge te verskans.”

Mnr. Paul Lynch, voorsitter van die Suid-Afrikaanse Wol- en Bokhaarkopersvereniging (Sawamba), sê omdat die Merino-mark- aanwyser uit 85 verskillende tipes wol saamgestel word, sal dit moeilik wees om die weeklikse beweging daarvan te manipuleer. “Om dit wel te kan doen, sal ál die maatskappye wat by wolverhandeling betrokke is, moet saamspan. Dit is totaal ondenkbaar.” — THEUNS BOTHA