STADIG MET DIE SUURLEMOENE
DIE Suid-Afrikaanse Sitruskwekersvereniging (CGA) se suurlemoenfokusgroep is bekommerd oor die skerp toename in suurlemoenaanplantings en waarsku dat daar teen die huidige koers ’n ooraanbod op die wêreldmark kan ontstaan.
Mnr. Justin Chadwick, voorsitter van die CGA, sê Suid-Afrika lewer tans omtrent 17 miljoen kartonhouers (15 kg) suurlemoene per jaar. Verskeie opnames in die bedryf wys dat hierdie produksie oor die volgende vyf tot sewe jaar tot tussen 25 miljoen en 30 miljoen kartonhouers gaan styg.
Chadwick sê ’n groot deel van hierdie groei is te danke aan aanplantings in die Wes-Kaap waar sommige wynboere tans wingerde omskakel in sitrus. Baie van hulle plant suurlemoene aan.
Hy wys daarop dat dit nie net Suid-Afrika is wat al hoe meer suurlemoene aanplant nie en sê selfs die Noordelike Halfrond se nuwe aanplantings kan bydra tot ’n oorvol mark.
“Hoewel ons seisoene vir sitrusproduksie nie oorvleuel nie, kan ’n mens suurlemoene byna deur die hele jaar lewer en ons moet dus selfs in die Noordelike somer met boere daar meeding.”
Die CGA beveel aan dat boere hul aanplantings van suurlemoe- ne teen die agtergrond van hierdie statistieke oorweeg.
Mnr. Piet Engelbrecht van Piet Citrus in Limpopo sê dit maak nou eerder sin om lemoene aan te plant. “Dit gaan nie baat om boorde te vestig wat ’n mens vyf jaar lank geld kos en dan moet jy jou suurlemoene teen ’n verlies verkoop wanneer jou bome in produksie kom nie,” sê hy.
“Mense gaan nie sommer meer suurlemoene begin eet nie, maar na lemoene is daar altyd ’n vraag.”