Nuwe koringtarief is knuppel in hoenderhok
’n Nuwe koringtarief van R947,20 is op 23 Junie deur die minister van finansies aangekondig. Dié tarief is egter al op 9 Augustus 2016 bereken. Let op al die nagevolge van die nuwe tarief en hoe dit bereken is.
Die nuut afgekondigde tarief van R947,20/ton verskil van die berekende tarief/reg op koring van R483,76/ton, soos van toepassing op 23 Junie. Dit is die datum waarop die tarief in die Staatskoerant aangekondig is. Dit dui aan dat daar binnekort ’n verdere aankondiging in die Staatskoerant kan wees om die nuwe koringtarief van R483,76/ton aan te kondig.
Die koringtarief het sedert 31 Maart 2016 tot die dag voor die aankondiging van die nuwe tarief R1190,20/ton beloop. Die nuwe tarief van R947,20/ton is dus R243 laer as die vorige tarief van R1 190,20/ton. Die berekende ongepubliseerde tarief van R483,76/ton is R706/ton laer as die vorige tarief. Laasgenoemde kan nog aangekondig word.
Die berekende tarief van R483,76/ton in die TABEL is op 23 Junie volgens die nuwe tariefformule bereken. Die gepubliseerde tarief wat op 23 Junie in die Staatskoerant aangekondig is, beloop R947,20/ton.
Die tarief is gegrond op die drie weke skuiwende gemiddelde van $189,67/ton, soos dit op 9 Augustus 2016 van toepas- sing was. Die jongste drie weke skuiwende gemiddeld, soos op 23 Junie, beloop $237/ton.
Tweedens is die wisselkoers van R13,42 teenoor die dollar soos op 9 Augustus 2016 van toepassing gebruik om die gepubliseerde tarief se waarde te bereken. Die wisselkoers wat gebruik word om die tarief op 23 Junie te bereken, is 3,2% sterker en beloop R12,99.
Derdens is die reële effektiewe wisselkoersindeks vir Julie 2016 gebruik, wat toe 0,79 beloop het. Vir die berekende tarief op 23 Junie beloop die jongste beskikbare REWK-indeks 0,8864.
Die Suid-Afrikaanse Graaninligtingsdiens meld dat die jongste beskikbare REKW-indeks gebruik word. Die mees gepaste indeks soos in die maand van toepassing wanneer die tarief aangekondig word of in werking tree, is dan nog nie bekend nie en kan dus nie gebruik word nie.
Laastens word ’n reële indeks gebruik wat nie die impak van inflasie weerspieël nie. Hoewel dit ’n klein bedrag is, word die aangekondigde koringtarief met inflasie gepenaliseer omdat ’n reële indeks gebruik word. Dit dra alles by tot ’n verskil van $47,33/ton en verklaar waarom die gepubliseerde tarief van R947,20/ton soveel hoër is as die berekende tarief op 23 Junie.
As my afleiding nie verkeerd is nie, kan ons teoreties binnekort ’n verdere aankondiging van die koringtarief verwag vanaf die huidige R947,20/ton soos dit op 9 Augustus 2016 (11 maande tevore) bereken is. Die nuwe tarief kan volgens die nuwe koringtariefformule R483,76/ton beloop.
As boere gelukkig is, word dit ook eers ná 11 maande in Mei 2018 afgekondig. Die belanghebbendes in die waardeketting wat sal baat vind by ’n hersiening van die koringtarief, soos op 23 Junie 2017 en nie 9 Augustus 2016 nie, sal druk op die Kommissie vir Internasionale Handelsadministrasie plaas om die nuwe koringtarief te laat aankondig. Dit sal beteken koringinvoer kan goedkoper wees.
Let egter ook daarop dat die beskerming wat produsente met die vorige verwysingsprys van $294/ton geniet het, nou met die hersiening met 5,1% gedaal het tot $279/ton omdat die vyfjaargemiddelde prys van harde rooi winterkoring gestyg het. Produsente se beskermingsvlak wat die koringtarief gebied het, het teoreties met 5,1% gedaal.
Met die nuwe tariefformule en indeks wat gebruik word, is die verskil in rand egter in die orde van R408/ton of 46% minder.
Vergelyk die berekende tarief van R892,32/ton met die reg op koring voor die aanpassing soos met die vorige tariefformule bereken. Die berekende tarief van R483,76/ton volgens die nuwe tariefformule soos op 20 en 23 Junie onderskeidelik is gebruik. Die twee hangende tariewe wat aangekondig moes word, sal ook nie meer aangekondig word nie.
Solank ’n koringtarief bestaan en koring ingevoer word, beteken dit die plaaslike produsenteprys van koring behoort steeds sywaarts te verhandel en nie skerp te daal soos dit sedert 23 Junie die geval was nie.