ONDERSOEK DIEFSTAL VAN DROOGTEHULP
Agri SA het op ’n bedrogspul afgekom rakende die droogtehulp wat veronderstel was om boere van ondergang te red. Afgesien daarvan dat miljoene rande van die geld wat die Regering beskikbaar gestel het, nie bestee is nie, het sommige diensverskaffers hulle na bewering ook ryk gesteel. Daar is vasgestel dat voer wat verspei moes word, skynbaar vir eie gewin verkoop is. Boorgate wat gesink moes word, het honderdduisende rande meer gekos as wat gewoonlik daarvoor betaal word. Boonop kan daar van miljoene rande nie rekenskap gegee word nie. Dié wanpraktyke laat Nkandla soos ’n speletjie lyk.
Eintlik moet ’n mens nie praat van wanbesteding, onreëlmatigheid of pligsversuim deur die amptenare wat moes toesien dat die geld korrek aangewend en die hulpmiddels versprei word nie. Dit is eenvoudig korrupsie, diefstal en bedrog. Dit kan vergelyk word met ’n vliegtuigramp waartydens noodhulpwerkers op die toneel opdaag en pleks van om die slagoffers te help, hulle rot en kaal besteel.
Dit blyk ook uit Agri SA se ondersoek dat kommersiële boere ’n skamele 2% van die toegewese geld ontvang het. Dit is opvallend dat die Departement van Landbou, Bosbou en Visserye nie enige landbou-organisasies wou gebruik om te help met die verspreiding van voer en ander hulpmiddels nie. Hierdie organisasies weet immers van boerdery, asook hoe om die hulp tot by die boere te bring. Natuurlik was die gaping om geld te steel, toe reeds duidelik.
Nou verstaan ek die segsman van die departement gaan
darem aan die departement verslag doen oor boere se bekommernisse oor dié hele gemors. Nou toe nou!
Hierdie saak is ’n kriminele aangeleentheid en bied die ideale geleentheid aan die Valke om hul staal te toon en die skuldiges voor die hof te bring. Die norm is mos om bloot ’n korrupte, hooggeplaaste staatsamptenaar met ’n goue handdruk huis toe te stuur, sonder dat sy of haar dade ooit die hof haal. IZAK SMALMAN Potchefstroom